Uphilisa okwenyamazane umfundisi "othakathayo"
Indaba isuswe amahlebezi
UPHINDE washiya kulenga ingidi emzini wakhe wacela empunzini wayobhaca umfundisi weCatholic Apostolic Christian Church of South Africa, eDukuduku eMtubatuba, ogwini olusenyakatho yeKwaZulu-Natal, ebalekela amalunga omphakathi okuthiwa abefuna ukumsoconga ngoba emsola ngokuthakatha.
ILANGA like labika ngobunzima obubhekene noMfu Themba Mthethwa (30), obuye abe ngumthandazi kule ndawo.
Kuzokhumbuleka ukuthi uMfu Mthethwa usizwe wukuthola umyalezo obumxwayisa ngokuthi makabaleke ngoba kunabantu abahlela ukumbulala. Utshele
ILANGA ukuthi ngesikhathi ebaleka okukuqala, amalunga omphakathi avuke indlobane avala indlela eya kwakhe ngezihlahla - okwenze kwangadlula lutho olubheke emzini wakhe.
Uvezele leli phephandaba ukuthi amahlebezi asuke ngonyaka odlule mhla zizine kuNcwaba ((August) kulandela ukushona komfana omhlasele emgwaqweni ngesikhathi ephuma ukuyovota.
Uthi omunye wabafana abebehamba nomufi ngesikhathi ehlaselwa utshele umphakathi ukuthi ubambe uMfu Mthethwa ethakatha kubo.
Utshele ILANGA ukuthi umphakathi uvele wavuka inj’ ebomvu wafuna ukumbulala ushise nendlu yakhe ngenxa yokubhebhetheka kwalezi zinkulumo. Uveza ukuthi kunabantu abafuna ukudicilela phansi isithunzi sakhe ngalezi zinkulumo.
Uthi emuva kokuba isimo sesingcono endaweni, ubuyele kwakhe njengoba kube nemihlangano yokubhula lomlilo.
Utshele ILANGA ukuthi sekubuye kwaqubuka umsindo endaweni okumphoqe ukuba aphindele ekubhaceni - ngoba ebona ukuthi akaphephile.
“Ngibonile ukuthi kangiphephile endaweni ngoba umphakathi kuthi mawungidle ungifele uma ungibona.
“Ngikhuluma nje kunowesilisa wasendaweni ongikhe ngequpha phambi kwabantu ngesikhathi kubizwe umhlangano womphakathi.
“Ngibone ukuthi kungcono ngiphindele ekubhaceni ukuze ngizophepha. Inzima impilo engiphiliswa yona ngoba kangisahambi ngokukhululeka, kangisakwazi ngisho nokwelapha abantu abadinga usizo,” kusho uMfu Mthethwa.
Uthi impilo yakhe iseDukuduku ngoba yikhona lapho anebandla khona.
UMnu Wiseman Myeni, oyikhansela kule ndawo, uthe impela into efana nale yenzekile ngesikhathi kunomhlangano womphakathi.
Uthe kabalugqugquzeli udlame emphakathini. Okhulumela amaphoyisa KwaZulu-Natal, uColonel Thembeka Mbhele, uthe likhona icala elivuliwe esiteshini samaphoyisa eMtubatuba, kwaboshwa owesilisa oneminyaka engama-38.
“Lo owesilisa uthweswe icala lokushaya yiNkantolo yeMantshi yaseMtubatuba. Ulivumile icala lokushaya uMnu Mthethwa. Inkantolo ibe isimhlawulisa,” kusho uColonel Thembeka Mbhele.