Makuchazelwe abantu ngolukagesi
MHLELI: Kakumele sidlale ngezinhliziyo zabantu uma kukhona esikudingayo kubona, uma sesikutholile bese siyaqhela singabe sisabanaka, sibashaye indiva.
Lokhu ngikusho emuva kokuthola ukuthi abantu bahleli kabi eNanda ngenxa yokuthi bacinyelwa ugesi. Ngesikhathi kuphunywa imikhankaso abantu basuke bethenjiswa izulu nomhlaba ukuze kutholakale amavoti abo kuthi uma sebebavotele labo abathile, bese kucweba isiziba uma sekumele banikezwe zonke izinto abebethenjiswa zona.
Ngikusho lokhu nje, kamuva sisuka okhethweni lohulumeni basekhaya kodwa kunomphakathi onganakiwe yize kunamakhansela owakhethile ukuze athumele izidingo nentuthuko. Ngicabanga ukuthi sekuyisikhathi sokuba amakhansela aphake amabhodwe ayewapheka ngazo zonke izinongo ngesikhathi ekhankasa kubantu.
Ngikhuluma nje, sekuyisikhathi eside yaziwa inkinga ebhekene neNanda ngodaba lukagesi kodwa lutho iminyakazo. Lokhu thina njengeNkatha sikubona kungekuhle futhi kuwukwedelela abantu abavotile, bevotela izidingo.
Nokho ngeke kwasisiza ukuba kuqaguliswane ngamagama, kodwa thina njengeNkatha, sicela umnyango kagesi kuMasipala weTheku wakhe noma wenezele izithuthimandla zikagesi iNanda yonkana. Lesi sicelo silandela ukungenami kwabantu baseNanda emuva kokuba ugesi wakuleya ndawo ucisha njalo ngezikhathi zokupheka ntambama, sebebaningi abantu abasebenzisa izimpahla zikagesi, kutholakala ukuthi isithuthi sikagesi siyakhathala bese siyacisha ngoba singasenawo amandla okumumatha wonke umthamo wakuleya ndawo.
Kusukela ngamasonto edlule, ugesi wakule ndawo ubulokhu ucisha ulayitha ngaso lesi simo esiwukhungethe wokusindelwa. Ugcine ucisha ngithi isonto lonke obesekuholela ekubeni abantu babhikishe kuleya ndawo, bekhala ngokuthi kungani umasipala ungabakheli ezinye izithuthimandla zikagesi.
Ngisho lokhu nje, kuze kwathikamezeka amabhizinisi angaphakathi okubalwa amatekisi ngoba abantu bebevale umgwaqo izimoto zingakwazi ukuphuma nokungena kule ndawo. Sengiphetha, thina njengeNkatha siyabanxusa abantu baseNanda ukuba bangadicileli izimpahla nemigwaqo ngoba basazokudinga kodwa futhi siyakuqonda kakhulu ukukhathazeka kwabo ngokucishelwa ugesi ngoba kunezinto nokudla emakhaya okumoshekayo.
Umasipala kuzomele uhlele umhlangano uchazele abantu ukuthi inkinga ikuphi futhi ngabe yiziphi izinyathelo onazo ukuyilungisa le nkiyankiya kagesi. Thembinkosi Biyela Ikhansela le-IFP enyakatho yeTheku (North Central of Durban)