EZESIMANJE:
UKUSHUQULA ikhanda sekungenye yezindlela zokuhloba kwezemfashini. Wake wacabanga nje ukuthi koke kufike isikhathi lapho owesifazane ake aziqhenye aye emicimbini yezitatanyiswa eshuqulile? Phinde!
Phela uma kuthiwa ukhipha unyawo ububonakala ngokuba ukhiphe iduku ulilahle le, utone izinwele, ngisho abashadile imbala ububabona sebezivezile kancane kwi- baret izinwele.
Uma kungenjalo kufakwe i- fascinator ngenhloso yokuhloniphisa ekhanda.
Phela uma ungowesifazane, ungalifakile iduku, ikakhulukazi uma ushadile bekubukeka sengathi uzenza itshitshi noma kawuwuhloniphi umendo.
Ukushuqula kuyinto ejwayeleke kubantu abamnyama. Abanye bakuthatha njengesiko kodwa okuvelayo wukuthi kakusilo isiko kodwa wumkhuba.
Umshuqulo usho izinto ezahlukene kubantu abehlukene, ngisho nasemazweni angomakhelwane.
Ngokwe-blog.africaimports.com umsuka womshuqulo usuka engxenyeni esezanzi neAfrica (Sub- Saharan Africa). Uyindlela yokutshengisa inhlonipho nesigaba sokukhula. Ngisho amadoda imbala ayashuqula ukutshengisa isigaba esithile sokukhula. Umshuqulo ogqokwe ngowesifazane ukwazi ukukutshela ukuthi ngabe ungugogo, ungumfelokazi noma useshadile. Ngaphezu kwalokho umshuqulo uvikela ikhanda emisebeni yelanga. Entshonalanga ye-Africa imishuqulo ibizwa ngegele okuwulimi olubizwa ngeYoruba noma i-chafu ngolimi lwesiIbo. Kanti phesheya kwezilwandle iduku linomlando owehlukile futhi onosizi phakathi. Kuthiwa ngesikhathi abantu abamnyama beseyizi- gqila abesifazane babephoqiwe ukuba bashuqule amakhanda. Lokhu kwakwenzelwa ukuba kube nomehluko phakathi kwabelungu nabamnyama.
Lokhu kwenze iningi langakuthokozela ukushuqula. Kuthe ngezikhathi zama-60’s ngesikhathi abamnyama belwela inkululeko kwanoshintsho emishuqulweni.
Abesifazane bashuqula ngenhloso yokutshengisa amandla nokuziqhenya.
Kuze kube manje iningi labesifazane lisaligqoka iduku ukutshengisa ubumbano, ukuziqhenya nokutshengisa izimpande zabo zase-Afrika.
Okuqaphelekayo wukuthi ukushuqula akusikhona ukuthwala indwangu ekhanda nje kuphela, kodwa yimfashini enomlando onzulu phakathi. Eningizimu Afrika naseNamibia umshuqulo wasekhanda ubizwa ngeduku, eZimbabwe idhuku, eBotswana yi-tuku noma itukwi, eMalawi naseGhana iduku, eNigeria igele kanti eZambia yi-chitambala.
Uma kuza ekushuquleni kayikho indlela elungile noma engalungile yokushuqula kodwa wenza okuvumelana nawe.
Kukuwena ukuthi ufuna umshuqulo wakho ube mkhulu noma ube mncane, isitayela othanda ube yiso kanjalo nombala.
Okungangabazeki ngomshuqulo wukuthi ukwenza ubukeke usesitayeleni wehluke eningini, okuhle futhi wukuthi sekunezinhlobo eziningi zama- print ongakhetha kuzona ukuze ukwazi ukuhambelana nosuke ukugqokile, kungabe ugqoke casual noma formal.
Ungesabi ukugcoba i- lipstick egqamile.
Ungashuqula yize ugqoke casual noma formal. Ukuze ukwazi ukuba ugqame kahle umshuqulo uma ugqoke casual, gcoba i- lipstick egqamile njengombala obomvu, ophinki, o- orange neminye.
Ungesabi ukufaka amacici amancane noma amakhulu. Zama amastud noma amahoop earing.
Uma kusebusika zama ukugqoka i- headwrap yakho ne- jean, ama- boot, i- jacket neduku eligqamile. Ehlobo shuqula ngeduku eligqamile ( printed) mhlawumbe nengubo e- orange.