Uzogwaza ekhaya umdlali wePirates
UWome ufuna ukubuyela kwiSuperSport nendondo yegolide
UMGADLI we-Orlando Pirates uzogwaza ekhaya kowamanqamu weNedbank Cup ozogijinywa yile kilabhu neSuperSport United ngoMgqibelo ngo-20h15 eMoses Mabhida Stadium, eThekwini.
UDove Wome waseTogo obolekiswe yiSuperSport kwiBucs, ukugcizelele ukuthi ufuna ukuvalelisa iPirates ngokuyisiza inqobe iNedbank bese ebuyela kuMatsatsantsa.
Uthi uzimisele ngokuba seqenjini elizonqoba iNedbank kule sizini njengoba nangedlule ebesesikwatini seSuperSport iwina le nkomishi.
Ekhuluma neLANGA izolo ngoLwesithathu emini uWome, uthe: “Izinhlelo zalo mdlalo zihambe kahle kakhulu. Sizimisele ngokuwunqoba. Lena yisizini yami yesine ngidlala kweyamanqamu. Ngifuna ukuwunqoba nalona njengoba kwenzekile nanyakenye (iSuperSport ihlula iBucs ngo-3-2 kowamanqamu weNedbank Cup).
“Ngifuna ukubuyela kwiSuperSport emuva kwalo mdlalo ngigaxe indondo yegolide yokunqoba le nkomishi. Phela ngisengoweSuperSport kodwa ngeke ngibe nalo ngisho oluncane uzwelo kuyona kulo mdlalo.
"Umqeqeshi usidonse ngendlebe ukuqikelela ukuthi sisebenza kanzima enkundleni kodwa sidlale nebhola elihle.”
Lo mdlali uqhube ngokuthi esekwiSuperSport bekuhlala kugcizelelwa ukuthi kumele abadlali balwelane ensimini ukunqoba imidlalo ikakhulukazi eyamanqamu.
“Lokhu ngikufakile nakwiBucs ukuze siwunqobe lo mdlalo. Kangizisoli nakancane ngokubolekiswa kwiBucs yize singazange sibe nesizini enhle. Nokho lokho sifuna ukukujika ngokunqoba le ndebe. Sinabo abadlali abahle abazokwazi ukuphendula amatafula,” kusho uWome.
IPirates izokuya kulo mdlalo inenxeba njengoba emdlalweni we-Absa Premiership idliwe yiSuperSport United ngo-6-1 kule sizini esongwayo.
UKaitano Tembo oyisekela likaStuart Baxter ongumqeqeshi weSuperSport oshiyayo emuva kwalo mdlalo, uthe: “Abalandeli bazobuka ibhola leqophelo eliphezulu.
"Le nkomishi siyifuna ngendlela efanayo nePirates. Sinezinhliziyo ezibuhlungu njengoba kule sizini siphuthwe yinkomishi sihlulwa kowamanqamu (weTelkom Cup). Lona wumdlalo omkhulu kubadlali. Kumqoka ukuba sijabulise nezikhulu ngokuwina le ndebe ezophinda isifake kwiCaf Confederations Cup okumanje senza kahle kakhulu kuyona.”
Amathikithi alo mdlalo athengiswe wonke ngeledlule okwenze iPremier Soccer League (PSL) yakhipha isexwayiso sokuba bangalokothi basondele enkundleni abangenawo.