Izimo ezisehlelayo zisiqinisa ukhakhayi
NJENGALOKHU singabantu, sazi kahle kamhlophe ukuthi uma sizalwa ukhakhayi lwethu lusuke luthambile, lunyakaza sakuphefumula. Impilo nezehlo ezisehlelayo zikhonela ukuba zisiqinise ukhakhayi ngoba kaluqiniswa wubumnandi nobuhle nemfundo.
Izinto ezisiqinisa ukhakhayi ngezisehlela imihla namalanga singazelele.
Engosini yanamuhla bengithanda sivulane amehlo nemiqondo mayelana nezimo ezisehlelayo. Njengoba ngibhala nje, kunomuntu okhalayo ngesehlo esimehlele. Njengoba sengishilo ukuthi izimo ezisikhulisayo nezisiqinisa ukhakhayi yilezi ezisikhulisayo, injalo nje impilo.
Ekugcineni kosuku, lonke ukhakhayi lomuntu kufanele luqine. Yikho izincithabuchopho zithi uma ungenayo inkinga mhlawumbe yingoba uyinkinga. Kunezinkinga ezenzeka kithina esingeke senza lutho nje ngazo futhi esingeke sazivimba.
Yizo-ke nje lezi zinto esikhathini esiningi eziya ngqo okhakhayini zifike ziluqinise. Yingakho nje uke uzwe uma umuntu enconywa kuthiwe: “Unokhakhayi oluqinile usibanibani”.
Ngivame ukuthi uma ngikhuluma ngithi: “Yonke into eyenzekile bekufanele yenzeke ngoba vele isiyenzekile”. Kakusizi ukulokhu ubalisa empilweni. Kunezimo esingeke sakwazi ukuphinde sibuyele emuva siyozishintsha. Ubojabula uma ibhomu lempilo lishesha ukukuqhumela ngoba nje vele sonke singabantu, sigijima namabhomu ezifubeni.
Ngamafushane nje, ngiqonde ukuthi singamabhomu angaqhuma noma yinini, okusho ukuthi kunezimo ezikithi ezisengaqhuma yinoma nini, usengajikelwa udayiswe ngumngani wakho, usengaqanjelwa amanga nje ungenze lutho futhi kusengaqhuma ibhomu nje uthole umyalezo wokuthi umzali wakho akaseko emhlabeni.
Maningi amabhomu singabantu asazosiqhumela.
Akekho umuntu ongeke akhale empilweni futhi akekho ongeke aphoxeke. Impilo iyokwenza ukuba ubongele asebalala bese ikushiya ukhuluma wedwa usholo phansi uthi bayadela asebaphumula. Lapha emhlabeni sikhula kabuhlungu futhi impilo iyakuhlakaniphisa. Ukuba benginesikhathi sonke, bengiyothi kungcono ibhomu elisheshe liqhume kunebhomu elithatha isikhathi ukuqhuma.
Ungcono umuntu osheshe akugile ungaze uzikhiphe zonke kanti usazokugila. Ungcono umuntu okugila nisajola ungaze ushade naye kanti kawazi ukuthi unje.
Baningi abantu abashada namabhomu bengazi, abaqhumela emshadweni. Ezinye izinto uma zenzeka noma nje zibuhlungu kodwa ubojabula uma usheshe wabona ngoba ukuba kawusheshanga wazibona hheyi, ngiyesaba.
Impilo injalo nje futhi yizinto ezifana nalezo ezisikhulisayo, zisiqinise ukhakhayi. Masifunde ukwamukela izimo zinjengoba zinjalo. Bengihlale ngizibuza ukuthi kungani ingane izalwa inokhakhayi oluthambile futhi olunyakazayo, impendulo ithi ukhakhayi
luqina ngendlela.
* Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10. Siku-110 Williams Road uma usuzofika eDalbridge Train Station. * Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni. *UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034