UTHEMBISE UKWEPHUCA UBUZWE ABAKWA-GUPTA
UTHEMBISA ukwesula ubuzwe bomndeni wakwaGupta eNingizimu Afrika uNgqongqoshe wezaseKhaya, uNkk Hlengiwe Mkhize, inqobo nje uma kunobufakazi obuqandula ikhanda obuthi ubuthole ngendlela engafanele.
UNgqongqoshe Mkhize uthwale kanzima emuva kancane nje kokuba eqokelwe kulesi sikhundla ngesikhathi kuqubuka amahlebezi athi umndeni wakwaGupta uphathwe ngezandla ezintofontofo nguMnu Malusi Gigaba obehola lo mnyango kodwa osengungqongqoshe wezimali.
Ngeledlule uNkk Mkhize usesekile isinqumo sikaMnu Gigaba sokunika lo mndeni - ikakhulukazi unina kaMnu Atul Gupta, u-Angoori nomkakhe uShivani - ubuzwe bakuleli ngowezi-2015, wathi (uMnu Gigaba) akephulanga mthetho ngalokho.
AbakwaGupta banikwe ubuzwe ngokushesha emuva kokuba besidlulisele phambili isicelo sabo - kade sinqatshiwe ngoba kuthiwa kasihambisani nokudingekayo ukuze babizwe ngabaseNingizimu Afrika.
Noma ngubani obhalisele ukuba ngowakuleli, kumele ahlale khona iminyaka eyisihlanu, angaphumi isikhathi esiyizinsuku ezingama-90.
“Umthetho uyaluchaza uhlobo lwabantu okumele lunganikwa ubuzwe. Olunye lwalezi zinhlobo, ngumuntu osuke etholwe enecala. Uma-ke kuwukuthi kunobufakazi obutholakalayo (kulolu daba lwakwaGupta) singacishwa isinqumo sokukhishwa kwemvume,” kusho uNgqongqoshe Mkhize.
Uthe kunzima ukuthatha isinqumo ngokwethembela ezindabeni ezisabalele kwabezindaba.
Uveze ukuthi umnyango wakhe uhlolisisile ukuthi uMnu Gigaba ufinyelele kanjani esinqu- meni sokugixabeza umndeni wakwaGupta ngobuzwe, kakukho okushayisa ngamakhala okutholile. Nokho umbiko othunyelwe kusihlalo wekomiti lephalamende lezasekhaya ngumqondisi-jikelele walo, uMnu Mkuseli Apleni, kuvela ukuthi uMnu Gigaba akahambi- sanga ngomthetho ngoba akakwazanga ukubhala amagama amalunga alo mndeni ngesikhathi edingeka ephalamende. ngabeNews24