Kubuye ithemba bakhelwa indlu
Ubelokhu exhawula imeya
KUBE YINJABULO yodwa emndenini wakwaMthembu KwaMshaya, eMtubatuba, ogwini olusenyakatho yeKwaZulu-Natal, ngesikhathi wemukela indlu entsha oyakhelwe yiMeya yaseMtubatuba, uMnu Qhina Mkhwanazi, ngokubambisana nosomabhizinisi.
Umndeni waKwaMthembu, obuhlala endlini ebhidlikayo futhi enethayo, ubuyelwe yithemba ngempilo ungena endlini enamakamelo amane, esho ngempahla kanokusho izolo ngeSonto.
Ubuhlala endlini engekho esimeni nje, uhlala noMnu Solomon Mthembu (60), ongubaba wekhaya ophethwe wumdlavuza womphimbo. UMnu Mthembu akasakwazi nokukhuluma njengoba ebhotshozwe imbobo emphinjeni, okuyiyona asedla ngayo futhi engadli noma yini. Udla okusaketshezi kuphela okubalwa amasi nephalishi elingamanzi.
Ekhuluma neLANGA uNkk Siphiwe Ndlovu (56), ohlala noMnu Mthembu, uthi bese kuphele iminyaka eyisi-7 bephila kanzima.
“Lapho besihlala khona ubungekho ugesi, lokhu bekuyinkinga njengoba ubaba engasadli noma yini. Amasi besingakwazi ukuwathenga abe maningi njengoba besingenaso nesiqandisi ngenxa yokuthi besingenagesi.
“Besingakwazi nokwakha enye indlu njengoba imali kababa ibiphelela kodokotela, siphile ngemali engiyithola ngokuthengisa ubhanana edolobheni eMtubatuba. Ukwakhelwa indlu kwethule umthwalo obunzima emahlombe ethu njengoba noma ngimshiya ubaba ngiyodayisa sengizokhululeka ngazi ukuthi uhleli endlini ephephile futhi enganethi.
“Sibonga kakhulu kwimeya ngokusakhela le ndlu,” kusho uNkk Ndlovu.
UMnu Mkhwanazi uthi uze asukume nje akhele lo mndeni indlu yingenxa yeheheba lencwadi uMnu Mthembu ambhalela lona ecela usizo.
“Indlela asichaze ngayo isimo sakhe ngifikelwe wukuthi ngiye khona ngiyobona. Ngifika khona ubaba akazange akwazi ukukhuluma nami ngenxa yokuthi akasakhulumi kodwa ngizichaza ukuthi ngingubani, zivele zehla izinyembezi kuyena.
“Ubelokhu ekhale njalo ngaze ngahamba. Kungithathe izinyanga ezimbili ukwakha le ndlu ngoba bengibasusa lapho kade bakhe khona ngibayisa endaweni enogesi. Nakuba uMnu Mthembu engasakwazi ukukhuluma, kuyabonakala ukuthi ubejabulile esengena endlini yakhe entsha. Ubelokhu engibambe njalo, engixhawula,” kusho uMnu Mkhwanazi.
UMengameli weNkatha Freedom Party (IFP), iNkosi Mangosuthu Buthelezi, uthe kuyajabulisa ukubona umndeni obuxakekile uthola usizo ngokubambisana kwabaholi bomphaka- thi nosomabhizinisi.
“Miningi imindeni edinga usizo yingakho kubalulekile ukuba imali eyabelwe omasipala isetshenziswe ngendlela eyiyona, ingaxhashazwa futhi ingantshontshwa.
“Okubalulekile wukuba umphakathi uvotele amaqembu anabaholi ongabethemba futhi abazowusebenzela ngokuthembeka. Inkohlakalo idla lubi eNingizimu Afrika sizizwa mihla namalanga izigameko ezithinta abaholi bamaqembu ezepolitiki ezenzweni zenkohlakalo.
“Lezi zenzo zenkohlakalo zilibulele iqembu elibusayo ngakho kumele sihlale siqikelele ukuthi kazenzeki eNkatheni,” kusho iNkosi Buthelezi.
Icele abantu ukuba bababheke abaholi ukuthi baqhuba ngendlela efanele yini.