INTOMBI NTO IDLWENGULWE ETHOYILETHI LASEBHISHI
IYAQAQAMBA inhliziyo yowesilisa waseMacekane, eMpangeni, enyakatho-mpumalanga yeKwaZulu-Natal, okudlwengulwe indodakazi yakhe eyintombi nto, ebihamba uMkhosi woMhlanga, ngowesilisa waseMozambique besolwandle.
Lona wesilisa, esiligodlile igama lakhe ukuvikela isithunzi sendodakazi yakhe, uthinte ILANGA ekhala mi, ebuza ukuthi kanti abokufika bayobahlukumeza kuze kube nini uhulumeni uthule.
Echaza ngalesi sigameko, uthi indodakazi yakhe eneminyaka eli-15 ubudala, efunda ibanga le-11 eSihubela High School, idlwengulwe izikhiphile nabangani bayo besolwandle lwaseRichards Bay, ogwini olusenyakatho yeKwaZulu-Natal, zili16 kwephezulu - okuwusuku lwentsha.
Uthi izingane zakhe nezinye zasendaweni beziqashe imoto zaya olwandle.
Uthi indodakazi yakhe ibihamba nodadewabo - ozalwa ngumfowabo - onguntanga wayo, naye ohamba uMkhosi woMhlanga.
“Kuthe laba abami sebesemotweni, belungiselela ukugoduka, kwasho ukuthi abanye bebengakafiki. Bathe abanye besayobheka abanye abebengakangeni emotweni, lona wami waya endlini encane kanti kuzothi esengaphakathi alandelwe yilo muntu ofike wamdlwengula kungekho muntu ngaphakathi. Yize kade ekhala kodwa akekho omzwile njengoba amatekisi abebanga umsindo ngomculo.
“Umdlwengule waze waqeda lo muntu wamdedela, okuyilapho ethole khona intuba yokubaleka eyobika kwabehamba nabo ngosekumehlele. Bambambile lo muntu bamshaya babiza namaphoyisa waboshwa,” kusho uyise wengane.
Uthi selokhu senzekile lesi sigameko, indodakazi yakhe kayisenzi kahle nasesikoleni. Ike izivalele yodwa endlini ingakhulumi namuntu.
Uthe udokotela obeyihlola indodakazi yakhe nguyena oqinisekise ukuthi idlwenguliwe, wamzamela usonhlalakahle ozoyeluleka ngokwengqondo.
“Ubengakayi kusonhlalakahle njengoba ubesalinde ukuba aqede ukubhala izivivinyo zakhe. Okubuhlungu kakhulu wukuthi selokhu eboshiwe umsolwa amaphoyisa abengakaze asitshele lutho ngokuqhubeka kwecala,” kuchaza uyise wesisulu.
Okhulumela amaphoyisa KwaZulu-Natal, uLt Colonel Thulani Zwane, usiqinisekisile lesi sigameko wathi umsolwa uboshiwe wavela eNkantolo yeMantshi yaseMpangeni zili-19 kuNhlangulana (June).
Uthi umndeni uzobizwa enkantolo uma sekufanele uyophendula kodwa okwamanje kawukadingeki.