Imenenja kamasipala isongelwa ngokusocongwa
Ivundulule inkohlakalo
IHLAFUNA ijeqeza kuhle kwenyamazane imenenja kaMasipala waseJozini, enyakatho-mpumalanga yeKwaZulu-Natal, esongelwa ngokuyiswa kwagoqanyawo emuva kokuba ivundulule inkohlakalo ebiyenziwa phambilini kulo masipala.
UMnu John Khumalo useqiniselwe ezokuphepha emuva kokufaka isicelo njengoba ingamile imiyalezo ayithola kumakhalekhukhwini wakhe imazisa ngetulo lokwendiselwa koyisemkhulu.
ILANGA lithole ukuthi udaba lukaMnu Khumalo selusingethwe ngezobunhloli ezingeni lesifundazwe KwaZulu-Natal. UMnu Khumalo ufake isicelo sokuqiniselwa ezokuphepha nje ubesevele ezihlinzeke ngonogada aziqashele bona.
Ngokusho komthombo ongashayi eceleni, umkhuba usekhaya njengoba kunamakhansela amabili asolwa ngokwakha itulo lokusocongwa kukaMnu Khumalo.
Ethintwa uMnu Khumalo, uthe akasabuthi quthu ubuthongo, kuyenzeka kwesinye isikhathi angalali ngisho ekhaya.
Uthi uyazibona lapho ziqhamuka khona ezinye zalezi zinsongo futhi uyazi ukuthi zidalwa wukusebenza kwakhe ngokwethembeka, enqanda ukuba kungadliwa bume imali yabakhokhintela.
Lo masipala ubuphethwe yiAfrican National Congress (ANC) okuthe ngonyaka odlule, emuva kokhetho obelumhla zintathu kuNcwaba (August), wawela ezandleni zeNkatha Freedom Party (IFP) nayo engakwazi ukuwubusa ngenkululeko ngenxa yokulingana kwezinombolo zezihlalo zamakhansela.
Kuvela ukuthi uMnu Khumalo uvundulule amahlazo amabi kulo masipala, okubalwa kuwona nokusayinwa kwezinkontileka ezingekho emthethweni, ezinye izinkampani zasayinelwa izizumbulu zezimali ngemisebenzi ezingayenzanga.
“Ngihlala ngethuka izanya ngenxa yokusongelwa engikuthola kubantu engingabazi. Nokho-ke abanye ngiyabazi ngoba kabakufihli ukuthi banenzondo nami.
“Kangiphephile njengoba kulezi zinsuku kunabaphume umkhankaso wokubulala izimenenja zomasipala. Kangifuni ukungena esibalweni sababulewe, ngithanda ukuba izwe lazi ukuthi kunamakhansela amabili asephumele obala ngokuthi ayangizonda,” kusho uMnu Khumalo.
Kakuyena yedwa uMnu Khumalo ofake isicelo sokugadwa kulo masipala, nekhansela lakuwadi 19 uMnu Zakhele Njokweni - okuthiwa nalo lisongelwa ngokuyiswa kwagoqanyawo - lisifakile. Kubikwa ukuba selinikiwe abaqaphi.
Usomlomo walo masipala, uNkk Lindiwe Gumbi, ukuqinisekisile ukuhlinzekwa kwalaba baholi ngezokuphepha.
“Kuqale imenenja yasibikela ukuthi kunezinsongo zokubulawa ezitholayo. Ngesikhathi sisalinde ukuba kufike usuku lokuhlala kwamakhansela, ubesevele wangena ephaketheni lakhe waziqashela onogada bakhe.
“Kumanje sihlangene namakhansela sanquma ukuba anikezwe abaqaphi. Sibone ukuthi masikwenze lokho futhi sikuthathe njengokuphuthumayo. Kanjalo nokhansela uNjokweni usifakile isicelo sokuba kuqiniswe ezokuphepha kwakhe. Simnikile abaqaphi ngenxa yokuveza ubufakazi bezizathu zakhe,” kusho uNkk Gumbi.
Kangifuni ukungena esibalweni sababulewe, ngithanda ukuba izwe lazi ukuthi...