AMACIKO AZUZE ULWAZI
IPHOTHULWE ngomjuxuzo ingqungquthela yokucobelela abaculi abasafufusa ngolwazi eMgungundlovu, ngoMgqibelo ebusuku e-033 Lifestyle.
Le ngqungquthela ebizwa ngeMusic Will Save THE Day Workshop, ibihlelwe nguDJ Kabila osezakhele igama kulo mkhakha kanti iqale ngoLwesihlanu yaphothulwa ngoMgqibelo. NgoLwesihlanu eWinston Churchill, eMgungundlovu kube nezikhulumi ezahlukene ezicobelele amaciko ngokuningi okuthinta umculo.
Phakathi kwabacobelele amaciko ngolwazi kubalwa umsakazi weGagasi FM, uKing Sifiso, uDJ osezakhele igama kuleli naphesheya kwezilwandle uCuloe De Song, uKudo Skelm wakwaSoul Candy nabanye abaqhamuka ezinkampanini zomculo.
Amaciko aqhamuka komasipala abangaphansi koMgungundlovu abephume ngobuningi ukuzothola ulwazi ngalo mkhakha kanti athole nethuba lokubuza imibuzo ngokuthinta umculo.
UKabila ogama lakhe langempela nguSiyanda Makhanya, udalule uku- thi sekunesikhathi enesifiso sokubuyisela emphakathini omesekayo. Uthi nakuba ezinze eThekwini ngokuhlala kodwa ukwesekwa okukhulu ukuthola eMgungundlovu njengoba nemicimbi ajwayele ukuqashwa kuyona ingaphansi kwalo leli dolobha elidume ngokuthi iKwaNdongazibomvu.
Uthi unesifiso sokuba le ngqungquthela yenzeke minyaka yonke ukuze kube namanye amaciko athuthukayo aqhamuka kule ndawo. “Kubalulekile ukuba sibuyisele emiphakathini esesekayo futhi sicobelele abeza ngemuva kwethu ngolwazi ngoba kuhle ukubambisana,” kusho lo DJ oseke wasebenza ngaphansi kwenkampani iSolistic Music, kaDJ Black Coffee.
Uthi naye uhlangabezane nezingqinamba ezahlukene kulo mkhakha ngesikhathi esaqala ikakhulukazi njengoba ehamba ngesihlalo esinamasondo. “Kodwa ezinkingeni engibhekane nazo angizange ngibheke emuva ngiqhubekile ukuze ngizakhele igama,” esho.
UKabila ungomunye woDJ abahlonishwayo njengoba esekhiphe ama- album amabili adayise kahle.