Kuduma ikhanda kolaxazwe nengane
Kunzima nokuyenzela isitifiketi
ISISHO sesiZulu sithi kungcono ukwethemba itshe kunokwethemba umuntu. Simvule amehlo lesi sisho esengene ogibeni owesifazane waseGreytown, maphakathi neKwaZulu-Natal, osize owesifazane wamgadela ingane maqede washaya utshani nayo.
Lona wesifazane ogama lakhe nguNkk Nikiwe Mbatha, osebenza emakhishini eGoli, uthi ngowezi-2008 uhlangane nowesifazane onguNkk Nokuzola Mnini esontweni akhonza kulona, iTwelve Apostles eliseNewlands, khona eGoli.
Uthi ubesenenyanga eyodwa elokhu embona uNkk Mnini enkonzweni baze bajwayelana. UNkk Mnini ube esemcela ukuba amgadele indodakazi yakhe ebineminyaka eyisihlanu ngaleso sikhathi ngoba yena ubenenkinga ephelelwe wumsebenzi.
“Ngimchazelile ukuthi njengoba ngisebenza, ngeke ngikwazi ukuhlala nengane wabe esethi mangimcelele nakumama ekhaya amsize. Ngimcelelile kumama wavuma, ngamthatha umntwana ngamyisa ekhaya.
"Ngosuku lokuqala sifikile, ufonile ebuza ukuthi iphatheke kanjani ingane, iyajwayela yini," kusho uNkk Mbatha.
Uphinde wamfonela ngosuku lwesithathu ebuza ukuthi ingane injani. Emuva kwalokho akaphindanga wamthola ocingweni.
"Uma sengibuyela emsebenzini, nginikele lapho ehlala khona ngiyombheka ngafika kukhala ibhungane esethuthile. Kakukho okunye engikwaziyo ngaye ngaphandle kwamagama akhe nenombolo yocingo abenginikeze yona kodwa engasasebenzi.
"Ngeke sakwazi ukumdalula umntwana ukumvikela. Inkinga enkulu engibhekene nayo wukuthi akanginikanga isitifiketi sengane sokuzalwa. Esikhwameni ubefake ikhadi lomgomo nezingubo zayo kuphela.
"Ihleli nami nje, kayinasitifiketi sokuzalwa, nasesikoleni balokhu bengihluphe njalo ngaso ngilokhu ngibamba ngiye- ka,” kusho uNkk Mbatha.
Uthi njengoba le ngane isizoqeda esikoleni, impilo yayo izoma njengoba ingenaso isitifiketi sokuzalwa, ebesizosiza uma seyishaya umazisi. Uma eyoyizamela isitifiketi sokuzalwa, kuthiwa makathole unina oyizalayo.
"Kangazi ukuthi ngizomthola kuphi njengoba ngingenalo ikheli lakhe. Akukho okunye engikwaziyo ngaye ngaphandle kwamagama akhe nokuthi ukhuluma isiXhosa, engingazi-ke noma ngowase-Eastern Cape noma ngowaseWestern Cape yini,” kusho uNkk Mbatha.
Uthi kalikho icala elivuliwe ngalesi sigameko njengoba emaphoyiseni bathi makenze incwadi efungelwe kwaphela kanjalo.
Ongaba nolwazi ngokuthi ukuphi uNkk Mnini, angashayela usonhlalakahle M.L Madonsela, otholakala kulezi zinombolo: 033 502 0074 noma uNkk Mbatha otholakala kwethi: 083 352 8003. thandeka.ngobese@ilanganews. co.za