ABANTU SEBABA NGONHLIZIYO COSU
NGIKE ngabhala phambilini ukuthi isizwe ngesizwe sinezinto zaso nje ezimbi nezinhle esigqame ngazo futhi ongeke nje uze usishintshe kuzona.
Lokho kusuke kungasho ukuthi uma uxoxela abanye abantu ngazo usuke ukhombisa ubandlululo. Phela bakithi njengoba ubandlululo kuye kuthiwa lunuka phu, lukhona nolufake ama- perfume.
Mina nje kuyangijabulisa ukuthi nginegazi leShangane, phela abantu bakomalume laba banothando nozwelo ngokwemvelo nje - nami-ke bangithelele.
Umuntu noma angangibiza ngekwelekwele, ingoriya izizimbane, kakuthi diki - ngivele ngimbone nje yena eyisiphukuphuku esifake ingqondo yaso kwiDeborah Fraser -
I mean kwi- deep freezer. Kunesizwe nje oke uthi uya kusona uyobonisana naso ngezinto ezithile - mhlawumbe uyocela nje usizo - ufike ulwandle selugcwele lukhafula ama- octopus - ubone nje ukuthi ukuba kuya ngawe ngabe ucula ingoma ye-Atomic Kitten ethi “The tide is High” kodwa wena bese ungasho-ke ukuthi “but i’m holding on” uthi “Kulungile baba noma izulu lingahloma ngisezintabeni”.
Uthi uyafika kawukasho lutho, umuntu usethi: “Uzofunani-ke wena ngoba kade kukhona uDlamini la izolo ezoboleka inkukhu, kangazi noma uzwe kuthiwa mina ngingumashonisa wezinkukhu yini.”
Ezakomalume le eMaputo ungafika zidla iMatata - isitshulu senhlanzi esithakwe ngamantongomane nokunye okubalwa kukhona no-anyanisi - zikumeme zithi: “Venha nos deixar comer (woza sidle)” - phela kazizikhohliwe zingamaPutukezi izimambana, zibona uCristiano Ronaldo nje engowakubo.
Awufike abanye ontabakayikhonjwa bedla, bazokufida izindaba ukudla sebekufihle ngaphansi kosofa! Kunalesi sizwe-ke esinomkhuba ongemuhle, siyakuthanda ukungenela! Yiserenki, yisemtholampilo, kuyobukwa ikhilikithi - kodwa hhayi uma kuyonikelwa.
Ngike ngahleka ngacishe ngakhala ngiyothenga isibhuklabhukla senkukhu ngiyozibusisa. Bekunolayini omude wabesifazane nabo abebeyothenga le ncoso, waqhamuka lo anti wavele washona phambili - okuthe uma izisebenzi zasesitolo zimtshela ukuthi makame kulayini kwabe zitshele uBaleka Mbete ukuthi makavume ukuthi kuvotwe ngokuyimfihlo ukuchitha uMengameli Jakhobe Surprise!
Uzesabise ngokuthi uzotshela imenenja ukuthi uphathwa kabi eyikhasimende!
Hhawu zamthelekela lezi zintokazi ebezikulayini! Abantu bakithi abamnyama-ke kabasazishayi ezinye izizwe ngamawisa and other stuff, isibhakela sabo nje wukuthi bathi: “U- racist wena anti Madhumati Gupta, kade sakubona!”
Zisho njalo nje umuntu kakukapheli ngisho amaminithi amathathu zimbonile. Wukuthi nje abantu sebaba ngonhliziyo cosu, uma ukhuluma iqiniso bagijima bethi yi- discrimination!
Zibatshele-ke ezakubo kababa zithi: “Hhayi kasihlangani thina noDiscrimi Nation, yizizwe zaphesheya lezo futhi siyacabanga ukuthi ngezale koScandinavia, thina sazi oXhosa Nation, Zulu Nation, Sotho Nation mhlawumbe-ke noMpondo Nation kodwa yithina esibakhulu.”
Ezinye nje izinto ezisicasulayo uma zikhulunywa ngezizwe zethu kakufanele ngabe ziyasicasula ngoba ziyiqiniso, kokunye kusuke kuncokolwa. Ezinye zazo kufanele ngabe siyazihlekela nje kudlule - manje ukubona ukuthi siyacwaswa sekwaba yi- hobby kithina.
Uyabona nje izinto okukhalwa ngazo kuthiwe ziyacwasa, sezifana nendlu yolwembu, sekufanele unyathele ngesizotha ukuze ungabambeki, ukhulume amazwi akho uwacwecwe nge- potatoe peeler ngoba kungenjalo, ungagcina ukhokhe u-R150 000 kade uzincokolela uthi: “We Mkhekhelezi leli Shangane elidla umnkwankwa…”
Kuthiwe ucwasa uRev Mkhekhelezi nge- favourite dish yamaThonga. Ngike ngezwa nje enye insizwa icasulwa wukuthi uKgosi - odlalwa nguSello Maake KaNcube kwiThe Queen edlala ngelama-21h00 kusukela ngoMsombuluko kuya koLwesine kwiDStv (161) - uyathanda ukuthi: “La maZulu amabili…” uma ekhuluma ngoBrutus (odlalwa nguThemba Ndaba) noShaka (odlalwa nguSthembiso Khoza), ngaze ngayibuza ukuthi empeleni yini ecasulayo ngoba kusuke kudlalwa.
Umama nomalume bebebizwa ngezilwanyana ngakithi eMatholonjeni KwaDlangezwa ngoba kwaziwa ukuthi bazalwa yiShangane. Mina nje ngike ngibizwe ngengoriya ngabantu bakithi abampisholo - into engingazi noma yisilwane esiyi- vegetarian noma esiyi- frutitarian kodwa ngivele ngizihlekele nje ngibabuke ubulima.
Abantu ake bayeke nje ukuhlale becuphe ukuthi bayacwaswa. Mina ngafundiswa ukuthi uma ngabe into ukhombisa ukuthi iyakulimaza uma ikhulunywa, lowo osuke eyikhuluma uyajabula, ukujoja ngayo uze uzace ufane nesikelemu somuntu okuthi njalo uma ezothandaza, phathaphatha usebopha ibhande - encisha izikelemu ama- protein namavitamin.
Ngisakhula KwaDlangezwa ngangibizwa ngomubi. Ngangikhala ngibe luqanduqandu kwazisholo umkhulu uStshuwede uyise kaMsimbithi kodwa kwathi mhla bengibiza ngaleli gama ngivuma ngokumamatheka - yize kwakuqaqamba ngaphakathi - ababengibiza ngalo bajabha, bayeka.
Akuzona zonke izimpi ezinqotshwa ngezikhwepha - washo kanjalo uZola, umfo kaMnguni, sisasebenza enkontilakini sakha i- drain enkundleni yezemidlalo KwaMamdekazi ngesikhathi ngitshatha isaka likasimende ibhala likhona.
Uma kuncokolwa ngemikhuba yesizwe sakho - emihle noma emibi - ungakufaki enhliziyweni bese uyalwa. Uyoba nebhadi ugqisha izinto ezingenasidingo enhliziyweni kanti kawunayo nemedical aid - phela inhliziyo iyifool tank kayifani neToyota Tazz eyi- full tank. Mangethembe ukuthi kanginiphici bazalwane bami engibathandayo.