Badinga uthando abanesifo sokuwa
NGOKWEKHALENDA lezempilo, kusukela namhlanje ngoMsombuluko kuya kusasa ngoLwesibili, kufundiswa futhi kuxwayiswa ngesifo sokuwa. Ngokwezibalo zabe-Epilepsy.org, oyedwa kwabayi-1000, unaso lesi sifo.
Lesi sifo senziwa wukuphazamiseka kwendlela amagqamuzana obuchopho athumelelana ngayo imiyalezo. Yize lokhu kungaqondakali ukuthi kudalwa yini kodwa onaso uvele awe bese umzimba wonke uyadlikiza, kuqine imihlathi, akhihlize amagwebu kwesinye isikhathi aze azichamele.
Lokhu kuwa kungenzeka zonke izinsuku noma kanye ngemuva kwesikhathi esithile ngosuku. Ongoti bezempilo kabanalo ulwazi lokuthi sidalwa yini ngaphandle nje kokuthi kasiyona ingozi. Onaso angaphila impilo eyejwayelekile isikhathi eside, inqobo nje uma ezoyidla kahle imishanguzo yokusidambisa.
Zingaphezu kwama-40 izinhlobo zesifo sokuwa kodwa kusebenza umshanguzo owodwa kuzona zonke.
Okwenza amaphaphu angenyuki mayelana nalesi sifo wukuthi kasithathelani njengoba kwenzeka kwezinye okubalwa kuzona ufuba ne-sandulela-ngculaza.
Ongoti bezempilo bathi kawukho umuthi wokuselapha siphele nya. Bathi onaso unikezwa amaphilisi okusidambisa.
Kubalulekile ukudla amaphilisi owanikwa ngudokotela ngendlela okusuke kubhalwe ngayo. Kunemithi ephuzwa kanye, kabili noma kathathu ngosuku.
Uma sesimvukile, mphendule umlalise ngohlangothi bese ufaka umqamelo ngaphansi kwekhanda.
Mkhumuleni izibuko nezingubo ezimbambayo ngokukhulu ukushesha.
Guqa ngamadolo ngemuva kwakhe, ukumvimba ukuba angaphenduki kuze kuphele ukudlikiza.
Mbathise ngengubo noma ngethawula ngoba ngaleso sikhathi kuyenzeka azichamele noma azimoshele.
Ungazami ukuvimba ukudlikiza kwakhe ngokufaka isipuni emlonyeni wakhe noma ngokumthela ngamanzi.
Uma umuntu esimphethe efikelwa wubuthongo emuva kokudlikiza, myeke alale.
Uma esevukile engazi ukuthi kwenzekeni kuyena, mtshele ukuthi ubevukwe wukugula kodwa manje izinto sezihamba kahle.
1. Mnike isikhathi esanele sokuphumula.
2. Makangabhukudi noma ageze kungekho muntu omgadile.
3. Makangabuki ugesi obhanyazayo.
4. Makangahlali isikhathi eside ebuka umabonakude noma ikhompyutha.
5. Makangahlali eduze komlilo. Cha, abantu abanesifo sokuwa kabanawo umehluko kwabanye abantu. Bayakwazi ukudlala, ukusebenza nokwenza zonke izinto ezenziwa ngabanye abantu.
Okubalulekile kumele babhasobhe umlilo, bazise abanye ukuthi banesifo sokuwa ukuze bezosizakala uma bewa.
Umuntu onesifo sokuwa angashada futhi abe nabantwana. Abantu abanesifo sokuwa bayaludinga uthando nobungani.
thandeka.ngobese@ilanganews. co.za