EQINISWENI IVANGELI ESILILETHELWE NGABAMHLOPHE LIHLANEKEZELWE
USHEMBE NOBUNAZARETHA:
MHLELI. Ngokwedlule ngathembisa ukuthi ngiyobuye ngikhulume ngezinto uShembe afika wangazishintsha ebesizenza, okwaze kwenza amakhehla akwaMjadu athi: “Nangu-ke thina ebesilindile azositshela ngoNkulunkulu wokhokho bethu.”
Empeleni ivangeli elalethwa kithina ngabamhlophe labe lihlanekezeliwe noma lona lalingelibi. UShembe wathunyelwa ukuzobuyisa indlu kaDingane noSenzangakhona ekwedukeni kwayo. UNkulunkulu thina bantu abansundu besivele simazi, simbiza ngoMvelinqangi.
Kakulona iqiniso ukuthi besingamazi futhi singamkhonzi uNkulunkulu. Lokho kuwukuhlanekezela amaqiniso ngabomu. Ngithi ivangeli elalethwa kithina lahlanekezelwa ukuze sizibone singelutho. Uma umuntu eke wenza ukuba uzenyeze, kakube kusabalula ukuba uzethembe.
Ngikhuluma ngoNkulunkulu wokhokho bethu oshesha ukuzwa futhi asheshe aphendule. Manje uNkulunkulu esanikwa yena ngabezizwe kuthiwa uyashesha ukuzwa kodwa uyaphuza ukuphendula. Kangikhulumi-ke ngoNkulunkulu onjalo kodwa ukuze ngizeseke ngizocaphuna encwadini kaDetoronomy 12:1-5: “Lezi yizimiso eniyakuzigcina ukuzenza ezweni uJehova uNkulunkulu woyihlomkhulu akunike lona ukuba ulidle zonke izinsuku zokuphila kwakho emhlabeni.
Niyakuchitha zonke izindawo lapho izizwe eniyakuzidla bezikhonza khona onkulunkulu bazo, ezintabeni eziphakemeyo… nesule igama lazo kuleyo ndawo kodwa indawo uJehova wenu ayakuyikhetha kuzo zonke izizwe, leyo ndlu yakhe niyokuyakha.”
Ngamafushane nje, lapha kuthiwa kuyokwakhiwa indlu lapho sesiyekisiwe thina lapho ebesikhonza khona uJehova. Ithi-ke le ncwadi nasezintabeni lapho besikhonza khona uJehova siyoyekiswa futhi kubhidlizwe namaaltare ebesikhonza kuwona ukuze uNkulunkulu wokhokho bethu adede kithina.
Yingakho ngithi leli vangeli esalethelwa lona lihle impela kodwa lihlanekezeliwe. UShembe ufike wazosibuyisa ekulahlekeni kwethu. Le ncwa- di iphinde ithi namagama ethu ayoshintshwa. Amagama afana noMuzikayifani, uBhekimpi, uFalakhe njalo njalo kwathiwa ayisinengiso kuNkulunkulu. Base benikwa amagama afana noMark, John namanye ngoba wona kuthiwa angcwele.
Yilokhu okwenza ngithi safakwa ukuzenyeza ukuze sizibone singabalahliwe. UNkulunkulu ongasheshi ukuphendula kakusiye uNkulunkulu wethu lowo, thina besivele sikhuluma noNkulunkulu aphendule ngaleso sikhathi. Pho ngonjani lona oshesha ukuzwa kodwa aphuze ukuphendula?
Ngethuka kwaphela nasozwanini ngifunda enye intshumayelo ebhalwe ngasebahlubuka lapha eKuphakameni (eBuhleni) bethi singamaJuda.
Cha ma-Afrika, uNkulunkulu akasidalanga ngephutha, singama-Afrika nje angabeNguni nezinye izinhlanga.
Abantu sebaphenduka amazemtiti, benyanya imfundiso yoyisemkhulu bathi bona sebesindisiwe, ngeke bakhulume ngamadimoni. Kuqala bekuthi uma umfazi kungavumi atete, kusuke isalukazi sizungeze indlu sikhuluma
noNkulunkulu wobabamkhulu noma kusuke umnumzane wekhaya angene esibayeni akhulume bese umfazi ayishaye phansi ingane.
Pho ngobani abebengakholwa? Abantu bakithi bakhuluma baqekebula ngokwezinye izizwe, kodwa bebe bengalazi nehubo lakubo. Bakutshela kahle ukuthi bona sebasindiswa bazi uJesu kuphela into yamadimoni kabayingeni.
Uthole ukuthi akamazi ngisho ukhokho wakhe kodwa ngeke umtshele lutho ngenzalo kaDavide.
Ingani phela ubona okwakubo kuyichilo kepha okwezizwe kungcwele. UShembe ufike wazovuselela inkolo yethu lapha e-Afrika, futhi yingakho enyamanambana ngoba uvuselele ubuthina.
Lokho kuvalekile ngisho kubaholi okufanele ngabe balandela uShembe, bakhetha ukuyokhonza kuwona la mabandla afike nabezizwe. Ingani phela insila yokuzenyeza nokuzenyanya isemathanjeni abo. Kangisho lapha ukuthi bonke okhokho bethu babelungile ngoba noShembe uyasho ukuthi abanye bahamba besebumnyameni.
Umuntu ogeza abantu abanjalo nguShembe kuphela, njengoba namanje basekhona abangakuboni ukukhanya. Ezweni lakithi kwesaKwaMthethwa, kunesomiso uShembe wacela abefundisi ukuba bathandazele imvula.
Babuza ukuthi uShembe usale kanjani yena.
Nempela inkosi yesizwe yambiza uShembe. Wafika wayichazela ukuthi yena wazi ukuthi imvula ikuyona inkosi. Wathumela amakhehla ayefake ongiyane futhi ebhincile ukuba akhuphukele entabeni uMnqagayi.
Athi ehla lapho ayesehla nemvula. Akusona sodwa leso sigameko esenzeka kwesakithi KwaMthethwa. Ngenxa yesikhala ngeke ngisisho esinye. Incwadi engiyifundile ithe: “Nibayekise nasezintabeni abebekhonza kuzo.”
Ngiyaphinda ngithi ivangeli lahlanekezelwa ngabomu, nathi savuma sakwenyanya okungokwethu.
Kangifuni-ke ningihumushe kabi nithi ngithe uJesu ngowabelungu uShembe ngowabantu ngoba kakusikho lokho uShembe asifundise khona.
Yebo uJesu wayezele amaJuda kuphela, naye uyafakaza ngalokho kodwa amaJuda kawamphathanga kahle aze ambethela.
UShembe uyafakaza ngokuthi lowo Moya owawukwa-Israel yiwona lona olapha eKuphakameni. Kuyaye kube kubi uma amaNazaretha ekhuluma kabi ngoJesu ekubeni uShembe ekhuluma kahle.
Lokho ngakusho kwezinye izintshumayelo zami ngichaza izinto ezenziwa nguShembe nazikhulumile ngoJesu. Sengiphetha nje Mhleli, ngizothatha incwadi kaDetoronomy 13:6-8: “Uma umfowenu, indodana yakho noma indodakazi yakho ekuyenga ngasese ethi ‘masiyokhonza abanye onkulunkulu ongabazi wena noyihlo’ ungamyeki, ubombulala.”
Uma ulahla okoyihlomkhulu uyisilahlwa soqobo.