KUYINKINGA UKUFUNDISA UMHOLI
MHLELI: Ngivumele ngiphawule ngodaba oluphume kwelakho lamhla zingama-22 kwephezulu isihloko esithi “Kuxabene ubendle kuKhongolose.”
Kuyinkinga ukufundisa umholi ngobuholi ngoba ugcina usufana nomuntu mhlawumbe ongahloniphi noma onenxa nalowo mholi.
Kuyamangalisa ukuthi umholi osezingeni likaMnu Amon Zondi angagijimela kwabezindaba ayosebenzisa bona ukumlekelela emkhankasweni wokhetho.
UMnu Zondi ubengunobhala wesifunda iHarry Gwala isikhathi eside, kuthe uma kusondela ukhetho, waqoma ukuzijuba ayoba yilunga lesishayamthetho wangaphikiswa muntu.
Nangesikhathi sakhe engunobhala akusho ukuthi zazingekho izinkinga njengoba esafuna ukuzipenda njengo- muntu ongcwele obehola ngomoya ongcwele nakhu phela esibalela ukuthi ngesikhathi sakhe, i-ANC ibisezingeni elingakanani manje isezingeni elingakanani.
Okokuqala nje, uMnu Zondi uyawazi umgomo nenqubo ye-ANC.
Ngaphezulu kwalokho, ngokwezinga lakhe, uma ebona inkinga angakwazi ngisho ukutshela umengameli ukuthi izinto kazihambi kahle ngale kokuba agijimele kwabezindaba ayonekela izwe ngezinkinga nezinselelo ezingaphakathi enhlanganweni.
Ngiyavumelana nalo mholi othe uMnu uZondi uyile nhlobo yomholi okuthi uma kungekho yena kulolo hlaka lufana nento engekho.
Kungani uma ebona ukuthi kunezinkinga yena njengomholi oqavile angahlali nabaholi besifunda abatshele ukuthi kuholwa kanjani? Kungani uMnu uZondi kuthi ngoba nakhu ungenele ukhetho agijimise ukuthi bambheca ngokuthi yingoba uzwana noMnu Senzo Mchunu?
Kungenaphi konke lokho emkhankasweni wakhe?
Le nto ayenzayo ikhomba ngokusobala ukuthi kwayena usadinga ukulolongwa kakhulu ngombutho wesizwe kwaANC, kawugiyi ngethambo lobuntekenteke bawo ikakhulukazi uma ungumholi.
UMnu Zondi makangenele ukhetho uma engaphumeleli akwamukele ukuthi abantu okwamanje kabamboni njengosihlalo hhayi le nto yokuphuma uyomemeza entabeni.