Aliyesabi inselelo "iChalaha"
ZISHO NTANGAYAMASHINGA MTHOBISI SITHOLE
NGABE kayikho into oyikhulumayo emlandweni kamasikandi uma ungakhulumi ngoSbongiseni owaziwa ngoMjikijelwa “iChalaha” Ngubane (34), ngenxa yamagalelo akhe okushaya ingoma emnandi nokuba ngumculi ozothile, owazisa abalandeli bomculo wakhe.
Le nsizwa edabuka kwaJikijiki, KwaMaphumulo, enyakatho-mpumalanga yeKwaZulu-Natal, iyaziwa kakhulu kumasikandi njengoba idonse isikhathi eside noKwakhe ‚ uMgqumeni‚ uKhumalo, iBhova likaDikadika (ongasekho), yaphinde yacula kwamanye amaqembu eBhova nangesikhathi iseyigidangoma.
UMjikijelwa ungumculi ongayesabi inselelo, lokho kubonakale ngokuthi ukwazile ukuvala ngisho imicimbi kamasikandi kusekhona uMtshengiseni “iNdidane” Gcwensa (ongasekho), obekwaziwa ukuthi nguyena ovalayo nokuthi abaculi bayesaba ukucula emuva kwakhe.
UMjikijelwa uyaziwa nokuthi ungumculi ohlale egabe ngezingoma ezivutha bhe ema-albhamini akhe, okuyinto abuye ahlonishwe ngayo kumasikandi.
UTHENGE IZIMOTO NGOMCULO
Ngomculo wakhe usekwazile ukuthenga izimoto ezingaphezulu kweziyi-6, wakha nakubo. Namhlanje ILANGA likhuthatha likubeke ngaleli ciko nangomlando omncane wezihasho zalo. Izihasho zalo zikanje:
“Inunu emnyama kwezakwabo Kodwa enhle ngemisebenzi yayo. Umagadla eshoshela ezihlangwini zamashinga
Kodwa abanye bagadla behlehla nyovana. Unogwaja ohlakaniphile Abathe bawakhela uzungu kanti kudala ubabonile. Kuseyiyo leyo ndoda Abahlezi beyibiza imihla nemihla Bethi ndawana thize bo Kuze kube inamhlanje izinsongo zabo lokhu zaphenduka ize.
Unhlamba zabafokazana azimnamathelanga Kodwa zaphelela emoyeni. Ufohla bevalile bethi ngeke angene okaMtikila
Kodwa wangena esegulukudela kunjalo Zaxega izinhliziyo kubafokazana. Umadolo acijile aleyo ntombi Eyagwaza isoka layo Lavuk'‚ ekuseni lingavalelisanga Lathi ngeke ngiphinde ngibuye ngizovakashela into enje.
Unkulumo zamavaka zikhulu nyelwa emakhoneni
Ethi engaqhamuka awathole esehleka”
INUNU EMNYAMA KWEZAKWABO
UMjikijelwa uthi nakuba emnyama ngebala kodwa inhliziyo nezenzo zakhe kuhle kakhulu. Le nsizwa ingene emculweni kukhona izinsizwa ezimbili ebezivimbezele kumasikandi, zithandwa, okunguMgqumeni neNdidane kodwa yafika yaduma phakathi kwazo. Yileso sizathu esenza izibize ngomagadla eshoshela ezihlangwini zamashinga. Lo mculi uthi uzibiza ngonogwaja ohlule wakhelwa uzungu ngoba ngesikhathi ephuma emaqenjini eBhova, uke wasongelwa ngezinye izinsizwa ezizamile ukumwisa, kwasho ukuthi usekubonile lokho.
Unhlamba kazimnamathelanga kodwa zaphelela emoyeni, lokhu kuqhamuke ngoba esephuma kwiBhova ngesikhathi sekuqhamuka izinkulumo zokuthi sebexabene ekubeni bekungenjalo. Kube khona abazame ukuxabanisa kodwa uma eqhamuka bezenze abamthandayo kanti abanye bebethi akanabalandeli bese uma esefikile ajatshulelwe okudlula bona abaculi labo.
UMjikijelwa uthi eminyakeni edlule uthandane nentokazi encane ngomzimba yamgwaza ngamadolo wabe esenquma ukuthi ngeke aphinde athandane nesilenda.
UMjikijelwa ufudukele eGoli ngonyaka we-1997 eyofunda eMatsidiso High School ngenxa yokuthi bekudlange izimpi KwaMaphumulo, kungasafundeki ezikoleni kwaphoqwa ukuba afihlwe eGoli waze wasiyeka kwaGrade 11 ngowezi-2001. Utshele ILANGA ukuthi ngonyaka wezi- 2001 bekunomcinjana eJabulani, eGoli wahlangana noMgqumeni wakhuluma naye, wamvezela isifiso sakhe sokujoyina amaqembu akhe, okubalwa Amatshitshi Amhlophe ngaleso sikhathi ayekade eshiywe nguMahawukela.
UMGQUMENI AKAZANGE ACABANGE KABILI
IBhova lathi kuMjikijelwa kungcono akakhulume noQondani banikezana izinombolo. Nebala wakhuluma noQondani Mthethwa - obesondelene neBhova - wathi makafike eThembisa lapho babezilolongela khona. Ngosuku lokuqala uyile eThembisa, abebelapho kabawuvalanga umlomo bebona izimanga abezigila.
UMgqumeni akakaze acabange kabili kodwa umthathile, wathi, "Lo mfana ngizobhubhisa ngaye izinsizwa.” Ngaleso sikhathi uMgqumeni ubesaqhuba umsebenzi kaMahawukela. Kufike isikhathi lapho eshiya khona amaqembu kaMahawukela - kwaba khona abashiya ukuba baqhubeke nawo. UMjikijelwa uhambe noMgqumeni.
Esephumile uMgqumeni emaqenjini kaMahawukela, usungule iqembu Amagcokama ebelishuthe neNdidane. Kuhambe isikhathi kwafika lapho iBhova lishiywa ngamanye amalunga alo, ahamba ayovula umuzi wawo.
UMjikijelwa uqhubekile wahamba nalo. Into eqaphelekile ngoMjikijelwa wukuthi ubengumfana obezihlupha ngolwazi futhi ekhuthele uma kunemidlalo.
Ukukhuthala kwakhe nokuba ngumfana obekhombisa ubuchule, kumenze ukuba uma kwenziwa izinto agcine ebizwa ngeNduna eNdlunkulu.
UMgqumeni ulithandile izwi likaMjikijelwa uma beziculela nje bendawonye, wagcina emcela ukuba amsize ngamaphimbo avumayo uma kudlalwa bukhoma emicimbini kanti ubephinde amsize nasestudiyo uma eqopha. UMjikijelwa noKhangelani "DSD" Mhlongo - ongumzala kaMgqumeni - banikezwe ithuba lokucula eqenjini iThwasa Lami. Ngesikhathi esekuMgqumeni uMjikijelwa, ubebambe iqhaza elikhulu, ubengagcini ngokugida kodwa ubebuye abhale izingoma.
Kunengoma edume kakhulu ayeyibhale ngokuhlanganyela noMgqumeni eyayithi “Laduma lamthatha umuntu oqamba amanga” nezinye. Zonke lezi zi- ngoma zicacisa ngokusobala ukuthi uMjikijelwa ubebambe elingakanani iqhaza. Ngowezi-2008 uMjikijelwa ubehlele ukukhipha umsebenzi wakhe ehamba yedwa kodwa engaphansi kweBhova.
UQondani uthathe isinqumo sokuthi uMjikijelwa makangaculi kwiThwasa Lami elithi “Lonakele Izwe”. Ngaleso sikhathi uQondani neBhova bebefunela uMjikijelwa inkampani, bamxhumanele noMnu Meshack Masondo weNTP Music Production, kwangavunyelwana ngoba uMnu Masondo ubesefuna ukumthenga.
Bese ziqalile izinhlelo zokuvula iMgqumeni Entertainment kodwa ibingekho imali eyanele yokumaketha abaculi abebezofakwa kuyona. Ngokubona ukuthi iMgqumeni Entertainment kayikabi namali, uQondani neBhova babe sebethi uMjikijelwa makazifunele yena. Uthi uMjikijelwa bahlanganile noDSD babonisana ukuthi mabaphume bobabili basungule iqembu labo ngokuhlanganyela. Emuva kokuba sebesifakile isicelo, iBhova libamisile kanti bona bese bephuthuma. “Kuthe sisabhala izingoma, ngezwa ezikaKhangelani zingehli kahle, kubonakala ukuthi zizosiqhatha neBhova ngakhuza lo mhlola wavele wathi uyahoxa-ke yena. Ngaleso sikhathi besinezingoma eziyisi-8 kuphela, kumele singene estudiyo ntambama.
"Ngibhale ezinye izingoma zokugcwalisela isigubhukane kulezi ebezishiywe nguKhangelani ngokuphuthuma, kwathi sekumele ngiqophe, ngathola ucingo lwasenkampanini iCool Sport luthi ngeke besakhokhela lo msebenzi ngoba umuntu obekwazi ukucula (uKhangelani) usehoxile, mina kuthiwa bengishutha kuphela ema-albhamini eBhova, kangazi lutho - okuyizindaba ebese zitshelwe le nkampani ngegama lami.
Kuthe ngisacula estudiyo izinyembezi zigcwele amehlo, kwatheleka uSxhobo Mpungose we-Amon Music kanti uzowuthanda umsebenzi wami wangisiza yaphuma albhamu yokuqala ethi “Sihlupheke Sonke”,” kusho uMjikijelwa.
"Uthi kayikho ingxabano ebephakathi kwakhe neBhova. IChalaha linendondo yeBest Popular Artist kwiSouth African Traditional Music Achievements Awards (Satma) yowezi-2011, eyeSong of the Year kuMantshontsho ezi-2016 neBest Masikandi Albhamu kuMaSouth African Voluntary Awards(Sava).
Ulale isibili emncintiswaneni ILANGA Mnandi Mahewu ethole amavoti angaphezulu kwezi-120 000. Ulale isine kwiTop Ten yoKhozi FM yokuhlukanisa unyaka, kuhlangene bonke abaculi ngowezi-2015 kanti usenama-albhamu angaphezulu kwangama-20.