INZIMA IMPILO KOMILWE YISIGAXA
AKASAKWAZI nokunyakaza owesifazane wasoPhansi, eJozini, enyakatho-mpumalanga yeKwaZulu-Natal omilwe yisigaxa ethangeni.
UNkz Fikile Ntuli (49), uthi usebalekelwa ngabantu nakubo ngenxa yokugula okungaqondakali. Uthi indlela esikhula ngayo lesi sigaxa, senza angakwazi ngisho ukusukuma. Utshele leli phephandaba ukuthi uyasukunyiswa nasembhedeni ngoba akasakwazi ukuma.
“Ngingamukela noma yiluphi usizo ngendlela engihlupheke ngayo nakuba ngingumuntu osindisiwe kodwa namakhambi esintu sengingawemukela.
"Ngiphila kabuhlungu, sengizibona ngingumuntu owehlukile kwabanye, ozenyezayo ngokuphila emphakathini,” kusho uNkz Ntuli.
Uthi lesi sigaxa siqale ukuvela ngowezi-2012 wahamba izibhedlela kodwa kwaba nhlanga zimuka nomoya. Uveze ukuthi isisindo saso silinganiselwa ema-25kg, okwenza ukuba umlenze wakhe uhlale ubuhlungu futhi umesinda.
Uthi ngesikhathi lesi sigaxa sisesincane, odokotela bathe senziwa wukuthi unesisindo esikhulu somzimba ngakho-ke kumele azivocavoce ukuze sizoncipha.
“Ngikuzamile konke abakushilo kodwa kangisizakalanga ngoba vele ekhaya sinemizimba emikhulu. Ngithe ngisazama lezo zaba, bathi mangidle nokudla okunomsoco kodwa kangiwubonanga umehluko.
"Ngihlale ngikhala nsuku zonke kangikaze ngizicabange ukuthi ngelinye ilanga ngingaphila esimeni esifana nalesi,” kusho uNkz Ntuli. Uthi kwesinye isikhathi lesi sigaxa sigcwala amanzi sibuye siqine sengathi yitshe noma sithambe sengathi sinobomvu. Utshele leli phephanbdaba ukuthi kuyenzeka sibe nephunga elibi kungangeneki nasendlini.
Uthi eminyakeni edlule ubedla imishanguzo yesifo sofuba wabe esesola ukuthi kungenzeka ukuba useyidle kakhulu. “Ngiyanikezwa amaphilisi ezinhlungu kodwa kakuzwakali lutho.
"Kangibulali ubuthongo, ngiyabona nomndeni usuwesaba ngisho ukuyibuka le nto ngoba iyethusa futhi isilahlise wonke umuntu ithemba,” kusho uNkz Ntuli.
Uthi bayafika osonhlalakahle beyomsiza emzini wakhe ngezaba ezithile kodwa kawukho umehluko.
Okhulumela uMnyango wezeMpilo KwaZulu-Natal, uMnu Sam Mkhwanazi, uthe bayasazi isimo sikaNkz Ntuli futhi bayasilandelela.
Uthi ngaphandle kokudalula imininingwane mayelana nokwelashwa kukaNkz Ntuli ngoba umthetho kawuvumi kodwa uyakuqinisekisa ukuthi esinye sezibhedlela uyaya kusona uNkz Ntuli.
“Izisebenzi zomnyango wezempilo ziyasihlola isimo sakhe njengoba esesimeni esiyingozi. Ngesonto eledlule bezivakashele nasekhaya lakhe,” kusho uMnu Mkhwanazi
Lesi sigaxa sibuye sixake ngephunga okungelula ubekezele.