Iyavutha i-ANC ngolwaseMatatiele
EZEPOLITIKI: lthi udaba maluyekelwe kwi-ANC kuzwelonke
IBHODLA umlilo i-African National Congress (ANC) e-Eastern Cape ngodaba lwemingcele, oluthinta uMasipala waseMatatiele.
Ithi lolu daba maluyekelwe kwiANC kuzwelonke, kungabi yinto ekhulunywa ngunoma ngubani emakhoneni ngoba lokho kwakha isithombe esibi sengathi selusemaphethelweni futhi sesithathiwe isinqumo ngalo sokuba iMatatiele ibuyele KwaZulu-Natal.
UNobhala we-ANC e-Eastern Cape, uMnu Oscar Mabuyane, ukusho lokhu engxoxweni ekhethekile neLANGA, ethi lokhu osekusabalele emiphakathini kokuthi iMatatiele ibuyela KwaZulu-Natal, yinganekwane, engathatha iminyaka emine abantu bakulo masipala bebe bedinga intuthuko.
Ubekhuluma naleli phephandaba emuva kokucobelelana ngolwazi nentsha engaphansi kukaMasipala wesiFunda i-Alfred Nzo, ehholo laseMatatiele ngeledlule - lapho ebefundisa khona intsha ngezinhlelo zokubuyisa umnotho ezandleni zabamhlophe, kuthuthukiswe nentsha emnyama.
“Inhlosongqangi yalokhu wukugqugquzela intsha ukuba izibandakanye nezolimo, wukuthi imihlaba eyaphucwa abamnyama ibuyiswa kanjani nokuthi athuthukiswa kanjani amadolobha amancane afana neMatatiele ukuze abantu bakhona bangayi kwezinye izindawo bayofuna imisebenzi,” kusho uMnu Mabuyane.
Uthi indaba yemingcele ethinta iMatatiele ngeke yamisa izinhlelo zabo zentuthuko nakuba isaxoxwa kuzwelonke “kodwa okusalayo leliya dolobha ngelaseNingizimu Afrika futhi kuyimpoqo ukuba lihlomule ezinhlelweni zentuthuko zikahulumeni.”
“Ngifuna ukukucacisa ukuthi iMatatiele ise-Eastern Cape, abantu bendawo namakhosi bavotele ukuba ifakwe ngaphansi kwesifu- ndazwe sethu futhi kaliyi ndawo ngoba lokho kuyothatha isikhathi nokuthi kuzomele kuchitshiyelwe umthetho ephalamende lapho i-ANC kuzofanele ibe namalunga angaphezulu kwama-65%” kusho uMnu Mabuyane.
Uthe le ndaba kuyaboniswana ngayo phakathi kwe-ANC ne-African Independent Congress (AIC) okungamaqembu anesivumelwano sokusebenzisana kwabanye omasipala.
“Ngeke nje sivume kubekhona izinqumo ezithathelwa abantu baseMatatiele zithathwa ngabanye abantu ngenxa yepolitiki ebhedayo. Abantu baseMatatiele bazozithathela bona isinqumo ngendawo yabo,” kusho uMnu Mabuyane.
I-AIC isishona ezintangeni njengoba ibifunge yagomela yathi kuzohlukana inhloko nesixhanti uma i-ANC ingakwenzi eyayivumelene nayo ngakho okuwukubuyisela iMatatiele KwaZulu-Natal. Umholi waleli qembu, uMnu Mandla Galo, ubengalubambi ucingo.
ISekela-nobhala le-ANC KwaZulu-Natal, uMnu Mluleki Ndobe, nalo likugcizelele ukuthi makuyekwe ukwenza sengathi iMatatiele ibangwa yizifundazwe ezimbili ezithintekayo.
“Udaba luyalandelelwa ngendlela efanele futhi kunekomidi elaqokwa eliholwa yilunga lesigungu esiphezulu sikazwelonke, uMnu Jeff Radebe,” kusho uMnu Ndobe.
Uthi kasikho isinqumo abangasithatha beyisifundazwe futhi ngeke bavume ukuqhathwa ngabezindaba ne-Eastern Cape.