Iconsisa amathe imiklomelo yeFNB 10km Surf Run
KUBEKWE u-R1 million ukuklomelisa abagijimi abazokwenza kahle kwiFNB 10km Surf Run ezokuba ngeSonto lomhla ziyisi-8 kuMfumfu (October) eThekwini.
Lo mjaho uqale eCape Town ngenhloso yokusiza intsha ukugxila emabangeni amafushane kwazise kakukhuthazwa ukungenela i-Ultra Marathon kwabangakaqini ukhakhayi. I-Ultra Marathon iqeda isivinini okwenza ilungele abantu asebekhulile.
Kulindeleke ukuba umjaho waseThekwini ungenelwe ngabasubathi abangaphezulu kwezi-14 000 njengoba kwenzeke eCape Town.
Umjaho waseThekwini wethulwe ngokusemthethweni ngoLwesine ebusuku emcimbini obuseMoyo, eShaka Marine World, eThekwini.
Lo mcimbi ubuhanjelwe nguElroy Gelant ophethe irekhodi laseNingizimu Afrika le-5 000m, uTanith Maxwell onegolide kwiTwo Oceans Marathon, uSipho Mbanjwa weBoxer owenza kahle emabangeni amafushane esifundazweni, uBonginkosi Zwane oyingqwele yeKwaZulu-Natal Marathon Championships, uBlanche Moila oseke wamela iNingizimu Afrika amahlandla amaningi ukukha nje phezulu.
Ukubhaliselwa kwalo mjaho kuvulwe mhla zimbili kwephezulu kanti kuzovalwa mhla zingama-25 kuMandulo (September). Umjaho uzosukela eMoses Mabhida Stadium uphinde uphelele khona. Imali yokujoyina ngu-R160 kube ngu-R180 kwabangenawo amalayisensi.
Kulo mjaho kulindeleke nabasubathi bangaphandle kwakuleli. Abakuleli ababhekiwe ngu-Elroy, uStephen Mokoka, uGladwin Mzazi, uLebogang Phalula, u-Irvette van Zyl, uMapaseka Makhanya ukubala nje abambalwa.
U-Elroy uthe: “Lo mjaho uzosisiza kakhulu ukuba senze kangcono izikhathi zethu kwazise kuzokube kukhona abasubathi baseKenya abenza kahle kakhulu emabangeni amafushane. Okuhle wukuthi iTheku lingiphatha kahle. Isikhathi esiningi uma ngigijima eThekwini ngenza kahle. Ngisanda kwenza u-28:16 kwi-10 000m kanti nyakenye ngenze u-27:44 khona lapha. Nginethemba lokuthi ngizokwenza kahle kulo mjaho.”
Abafuna ukuba yingxenye yalo mjaho bangangena kwi-website ethi: www.durban10k.com noma bangene ekhasini le-facebook: facebook.com/Durban 10km.