U-BAXTER UDALULA ISU AJUQE NGALO I-PIRATES
UVEZE iqhinga ajuqe ngalo i-Orlando Pirates uStuart Baxter ongumqeqeshi weSuperSport United elobole iBucs ngo-4-1 kowamanqamu weNedbank Cup ngoMgqibelo ebusuku eMoses Mabhida Stadium, eThekwini.
UBaxter uthi uyakwazi okusuke kumele akwenze nxa ebhekene neBucs. Uthi ubungozi bayo yibona kanye asebenzela kubona ngoba bubuye buyenze ibe buthaka. Amagoli anqobise ezikaBaxter okuyizona ebezivikela le ndebe avalelwe enethini nguBradley Grobler amabili, uJeremy Brockie noKingston Nkhatha kwathi eleBucs lokukhombisa ukuthi ibikhona emdlalweni laqulelwa enethini ngu-Oupa Manyisa kuyiphenathi. UBrockie uhlulwe yiphenathi ebizokwenza iSuperSport inqobe ngo5-1.
ISuperSport iyiphuze inyongo iBucs kule sizini njengoba ike yayitalabha ngo-6-1 eMbombela Stadium, eMpumalanga. Ukungabi naluzwelo kweSuperSport kucike abanye abalandeli beBucs abajikijele izinto ezithile enkundleni okuyinto ecishe yadunga lo mdlalo obuhanjelwe yizinkumbi zabantu.
“Isiwombe sokuqala sibe yilokhu ebesivele sikulindele. Sishintshe izinto ezincane ngesikhathi sekhefu. IBucs ithembele kakhulu kubadlali abathile abayithwalayo. Singene ngalelo nxeba (sabavalela ekopini). Ngibabongela kakhulu abadlali bami ngalo mphumela. Nami ngiyayijabulela le nkomishi ngoba inyusa iCV yami.
“Besingawahlohla amagoli ayisihlanu kuya kwayisi-6 kulo mdlalo. Sengiyobhekana nenselelo entsha yokucija iBafana Bafana. Ngikujabulela kakhulu ukunikwa leli thuba,” kusho uBaxter okugci- zelele ukuthi ukuba matasa kweSuperSport kwiCaf Confederations Cup kakunamthelela kulo mphumela njengoba iBucs isihlale amasonto ambalwa ingangeni ensimini.
“Angicabangi ukuthi lokho kukhona okukwenzile. Nokho-ke ukuba sihluliwe ngabe sikhala ngokukhathala. Lokhu kuyindlela ehlelekile yokubeka izaba esetshenziswa ngabaqeqeshi,” kusho uBaxter.
ISuperSport izifake emlandweni ngokuba yikilabhu yokuqala ukuqukula indebe yeNedbank amahlandla amathathu.