ABUYELE KWASIFUBA EZIKHULWINI ZE-SUPERSPORT NGOYEYE
AMATHE abuyele kwasifuba kubaphathi beSuperSport United abebeshaya amakhala ngoReneilwe “Yeye” Letsholonyane osayiniswe kule kilabhu nguStuart Baxter esuka kwiKaizer Chiefs.
ULetsholonyane udlale ingcwenga yebhola iSuperSport inabisa i-Orlando Pirates ngo-4-1 kowamanqamu weNedbank Cup ngoMgqibelo ebusuku eMoses Mabhida Stadium, eThekwini. Lo mdlali ujoyine iSuperSport ngokuqala kwale sizini emuva kokuba inkontileka yakhe ingavuselelwanga eziMpofaneni.
UStuart Baxter ozibeke phansi izintambo zokulolonga iSuperSport emuva komdlalo wamanqamu njengoba esejoyina ngokugcwele iBafana Bafana, uthe:
“UYeye ngimazela kwiChiefs, uphapheme nasejimini. Ngimlande ngazi kahle ukuthi uzongisebenzela kwazise bengimdinga kakhulu. Ngamtshela ngimsayinisa ukuthi ngifuna aqhubeke nokulwela ukunqoba ngaso sonke isikhathi.
“Abantu baseNingizimu Afrika bebethi usemdala. Ngisho izikhulu zebhodi zeSuperSport bezimanqika ngesikhathi ngizitshela ukuthi ngifuna ukusayinisa uYeye. Impela nginesiqiniseko sokuthi ungomunye wabadlali bezinga eliphezulu engibasayinise kwiSuperSport.”
Uthi umnyango kawuvaliwe kuYeye nakwabanye abadlali abathathwa njengasebekhulile kwiBafana.
“Siyabadinga abadlali abanesipiliyoni kweminye imidlalo. Ngizosebenzisa abasebancane kwiCosafa Cup bese ngifaka abanesipiliyoni kwiChan.
"Ngifuna ukuthi iBafana yakhiwe ngabadlali abaningi bezinga eliphezulu,” kusho lo mqeqeshi ozibonge kakhulu izikhulu zeSuperSport ngethuba ezimnike lona.
Uthi ujabule kakhulu ngokuphuma kule kilabhu ngezinga eliphezulu evikela isicoco abingelele ngaso ngesizini edlule.
Uthe unethemba lokuthi u-Eric Tinkler ongena ezicathulweni zakhe uzokwazi ukuqhubeka nomsebenzi awushiyayo kumaTsatsantsa.