I-ANC NENSELELO YOKULETHA UBUMBANO

IBHEKENE nomqansa wokubumba iqembu i-African National Congress (ANC) engqungqutheleni yayo yemigomo eqala kusasa ngoLwesihlanu eNasrec Expo Centre eGoli iphothulwe ngoLwesithathu mhla ziyisihlanu kuNtulikazi (July).

I-ANC iya kule ngqungquthela nje ibhekene nenkinga yokuhlakazeka kweqembu, yiminjunju yokungenzi kahle okhethweni lohulumeni basekhaya obelumhla zintathu kuNcwaba (August) nyakenye nokunye okuthinta imigomo mayelana noguquko kwezomnontho nokubuyiswa komhlaba.

UMnu Protas Madlala, ongumhlaziyi ozimele, uthi okuseqhulwini kunakho konke okumele i-ANC ikwenze, wukubumba iqembu.

“Lesi yisikhathi esinzima kakhulu kwi-ANC njengoba iya kule ngqungquthela ihlakazekile, kunomdonsiswano okhona phakathi kwamagatsha, izifundazwe nezinyunyana ezingamadlelandawonye nayo. Kuzomele iqale emazingeni aphansi ukuhlanganisa iqembu njengoba liqhubeka nokulahlekelwa ngamavoti,” kusho uMnu Madlala.

Uthi uyazi kuzoba nzima ukuba iphume kule ngqungquthela ikhuluma ngazwi linye kodwa izokwenza sengathi ibumbene emehlweni abantu.

“Eqinisweni kuzobe kungenjalo. Okubuhlungu ngepolitiki yamanje wukuthi ngeyezisu, kakuseyona eyokubeka izidingo zabantu phambili,” kusho uMnu Madlala.

Uthi kusazoba nzima kakhulu ngemuva kwale ngqungquthela njengoba kuzobe sekuqala umgqigqo obheke kweyokukhetha ubuholi engoZibandlela (December) nonyaka.

“Kuzoshuba kakhulu njengoba kuzobe sekucacile ukuthi ngobani abahamba nomholi othile.

“Empeleni i-ANC njengamanje idinga umholi onesipiliyoni, ozokwazi ukukhuluma njengomuntu omdala futhi ohlonishwayo,” kusho uMnu Mdlala.

Uphethe ngokuthi nakuba leli qembu lizobe selibukhethile ubuholi obusha ngowezi-2019 kodwa akaliboni lenza kahle okhethweni lukazwelonke ngowezi-2019.