KUKHUTHAZWE UMPHAKATHI UKUNGABI "YIMINQOLO"
UGQUGQUZELE abantu baKwaZulu-Natal ukuba bangabi yiminqolo undunankulu wakulesi sifundazwe, uMnu Willies Mchunu, ethi kumele ikukhuthalele ukuba yingxenye yezinhlelo zentuthuko kahulumeni, kuphele ukuba zizosebenza ngamandla kahulumeni nje kuphela.
Ubekhuluma ngoLwesibili eXobho, eningizimu yeKwaZuluNatal, ngesikhathi kuvulwa uhlelo olubizwa nge-Operation Vula olu- phathelene nokuthuthukisa abantu kwezamabhizinisi amancane.
Kuqhume uhleko etendeni obekwenzelwe kulona lo mcimbi kwazise inkulumo kaMnu Mchunu ebinongwe ngesiZulu “esihlabahlosile” ibadidile abaningi kwaze kwafanele ukuba ayichaze.
Wenze umzekelo ngomuntu owumnqolo - abembiza ngesihlalandawonye - okuthi uma amaphisi ephuma eyozingela yena azihlalele ekhaya, wathi uma sebebuya abebeyozingela bephethe inyamazane, kuye kuthi uma seyidliwa kube khona abamdabukelayo ba- mnike amajwabu - okuyinyama engenasithunzi futhi engemnandi.
“Uma ngikhuluma ngamajwabu ngichaza izikhumba ezingenanyama hhayi la majwabu kaDinangwe (esho uNgqongqoshe wezeMpilo KwaZulu-Natal, uDkt Sbongiseni Dlhomo oqhuba umkhankaso wokusoka kusikwe amajwabu),” kusho uMnu Mchunu.
Kulo mcimbi - obekukhona kuwona uMengameli Jacob Zuma nongqongqoshe baKwaZulu-Natal - bekukhona abaphathi bezikhondlakhondla zezinkampani zaseNingizimu Afrika abazibophezele phambi kwamalunga omphakathi ngokuthi bazofaka isandla baluxhase ukuze kuhlomule kakhulu osomabhizinisi abakhulayo ngokuba bakhiqize imikhiqizo ezothengwa yizinkampani ezinkulu.
I-Operation Vula ichazwe njengohlelo oluvula amathuba ezomnotho kubantu futhi isebenzisana ngqo neRadical Agrarian Socio-economic Transformation (Raset), okuwuhlelo olusheshayo lokuba osomabhizinisi abakhulu bathenge ama-50% emikhiqizo ezinkampanini zaseNingizimu Afrika.
Lolu hlelo kuthiwa luyixoshile indlala futhi lwenza kahle kakhulu emazweni afana ne-India.
Iminyango okulindeleke ixhase kakhulu lolu hlelo ngowezenhlalakahle ozothenga ukudla ngo-R2 million, owezemfundo ozofaka u-R1. 4 billion njengoba ukudla kokondla izingane eziyizigidi ezingama-22 ezikoleni zaKwaZuluNatal uzokuthenga kwiRaset nowezempilo obeke u-R150 million wokuthenga nokuthungelwa izimpahla zezibhedlela ezingama-50 kulesi sifundazwe.