Ulaxaze umsebenzi ngobizo lobufundisi
Zehle mi kunina eseyoshumayela
ULAXAZE umsebenzi awufundele wabuyela ekilasini ukuyokwenza izifundo zezenkolo uMfu Ntuthuko Malibongwe Nkosi (31), ogcotshwe ngokugcwele kulo mkhakha enkonzweni enkulu yeEvangelical Lutheran Church in Southern Africa (South Eastern Diocese) ebingeSonto ekomkhulu laleli bandla, eMphumulo Church Centre, KwaMaphumulo, enyakatho-mpumalanga yeKwaZulu-Natal.
UMfu uNkosi ugibele epulpiti esekhala mi unina, uNkk Phindile Nkosi, oyeseke kukho konke indodana yakhe kusuka ishiya umsebenzi kwaPerDM Marketing Company, eGoli.
Ubeyijoyine ngowezi-2008 le nkampani emuva kokuphothula izifundo zePublic Relations eDurban Institute of Technology (manje esiyiDUT).
Ngowezi-2012 wenze izifundo zobufundisi eLutheran Theological Institute (LTI) eMgungundlovu, ezithatha iminyaka emithathu edeskini bese kuba wunyaka nesigamu wokuvivinyelwa umsebenzi, akwenze eNquthu ngaphansi kukaMfu Mthembeni Zulu.
“Kube ngenkulu inhlanhla ukuba ngiqokwe ukushumayela ngosuku lomgcobo wami. Kuthe nxa ngazisa umama ukuthi yimina ozoshumayela, wethuka. Ukhale ezibonwayo ngesikhathi ngigibela nje epulpiti kwaze kwaba ngisonga intshumayelo, engakholwa ngabekubona,” kusho uMfu uNkosi ozalelwe oSizweni, eNewcastle, enyakathontshonalanga yeKwaZulu-Natal.
Uthi empeleni bekumele agcotshwe ngonyaka odlule eMpangeni, enyakatho-mpumalanga yeKwaZulu-Natal, ukuba akazange ahlangabezane nezinkinga ezifundweni zobufundisi aziqede ngowezi-2016.
“Abantu abaningi banomqondo wokuthi kulula ebufundisini kanti kuyafeyilwa nakhona. Kunesifundo okuphoqeleke ukuba ngisiphinde, okwenze engiqale nabo bagcotshwa ngowezi-2016 eMpangeni mina ngasala.
“Ngigcine ngisiphase ngama84% okwenze ngayithola iDiploma in Theology,” kuchaza uMfu Nkosi onikwe umsebenzi woku- hola ibandla lasePhangweni Mission, eMtshezi, maphakathi neKwaZulu-Natal - elingaphansi kwesekethe lasoNdini.
Ukhale ngenselelo yobubha ebhekene nomphakathi wasePhangweni osekwenze waqala ingadi ayilima nabafana bendawo ukuzama ukusiza ukuxosha ikati eziko.
Uthi kumele kuvuselelwe namahhoko ezinkukhu zomphakathi ukulwa nobubha kule ndawo intsha yakhona engene shi ophuzweni oludakayo.
“Kuwumsebenzi webandla ukuba yisibani emphakathini, libuyise ithemba lapho lishabalala,” kusho uMfu Nkosi obegxile enselelweni yokulandela uJesu Kristu entshumayelweni yakhe yangeSonto, ebigcizelela ukuthi uJesu akasoze akulahla nxa ukholelwa kuyena.
Kule nkonzo, ebiyenganyelwe nguMbhishobhi waleli bandla kwiSouth Eastern Diocese, uPhembukuthula Buthelezi - obesizwa nguMbhishobhi Musawenkosi Biyela nombhishobhi osethathe umhlalaphansi, uSimon Zulu ukubusisa abefundisi - kugcotshwe abali-13.