Kuningi asekwenzile ukufukula abahlwempu
Sekusizakale inqwaba
UZIZWA ethobekile futhi ejabule ngokubamba iqhaza ekulekeleleni intsha ukuba ifeze amaphupho ayo ezemfundo uMnu Cyril Ramaphosa, oyisekela-mengameli le-African National Congress (ANC) nezwe.
UMnu Ramaphosa ngomunye wabantu abahamba phambili emkhankasweni wokuthatha isikhundla sokwengamela i-ANC - esiyithikithi lokuhola izwe uma kwenzeka inqoba ukhetho ngowezi-2019 - usembangweni noDkt Nkosazana Dlamini-Zuma.
Ekhuluma emcimbini wokugubha iminyaka engama-21 kusungulwe iCyril Ramaphosa Education Trust (CRET) ngoMgqibelo epulazini lakhe eliseBela Bela, eLimpopo, uMnu Ramaphosa uthe:
“Simelwe yinselelo yokubuyisela emphakathini okuyiwona osenze saba yilokhu esiyikhona namhlanje. Ukulekelela intsha kwezemfundo ngenye yezinto ezinkulu ezithokozisa umoya wami,” kusho yena.
Kule minyaka engama-21 iCRET ikhona, isisize abafundi abalinganiselwa e-150 abaqhamuka emindenini ehlwempu, ibanika imifundaze. Ngosizo lwayo sekugogode abangaphezu kwama-50. Balinganiselwa ema-89% abafundi abalekelelwa yi-CRET abaphasile unyaka nonyaka kusukela ngowezi-2012 - lapho lesi sikhwama sisize abali12.
Ngonyaka odlule kugogode abayisi-6 abafunde ngomfundaze weCRET, kubalwa ababili abathole i- degree yezobudokotela nababili abathole iziqu ezifanayo kwezobunjiniyela. Kuwona owezi-2016, umfundi obexhaswe yiCRET, uthole iziqu kwiCardiology - okuwumkhakha ophathelene nezinkinga zenhliziyo - okube ngowokuqala ukuthola lezi ziqu esizwa yilesi sikhwama.
Ngowezi-2015, abebefundiswa yilesi sikhwama basungule esabo esibizwa nge- Alumni Fund, emuva kokuphonselwa inselelo nguMnu Ramaphosa. I- Alumni Fund ngokubambisana noMnu Ramaphosa, banikezele ngomfundaze kubafundi ababili abangaphansi kwe- CRET abafunda e-University of Witwatersrand - omunye wenza iBachelor of Science Degree (kwezobunjiniyela ezimayini) omunye wenza iBachelor of Accounting Degree.
“Ngibonga kakhulu ukwesekwa yizinkampani esisebenzisana nazo, eziphonsa itshe esivivaneni, okuyiGrindrod neScaw. Sikwazi ukwandisa isibalo sabafundi esibanika imifundaze nje, lokho bekungeke kwenzeke ngaphandle kwazo.
“Kulo nyaka senyuke kakhulu isibalo sabafundi esibalekelelayo njengoba bengama-70. Siyethemba ukuthi sizokwazi ukusenyusa lesi sibalo ngokuzayo. Njengoba abaningi balaba asebephumelele sebekwazi nabo ukuxhasa abanye abafundi abantulayo, lokho kukhombisa ukuthi umoya wobuntu uyavunguza eNingizimu Afrika.
“Ngalokhu sakha umoya woku- ba abantu bakwazi ukusizana, okuzokwenza ukuthi izwe lonke lithuthuke,” kusho uMnu Ramaphosa. Kulo mcimbi kuklonyeliswe abafundi abagogode nyakenye, abathole imiphumela emihle kakhulu kuyona yonke imikhakha nalabo abakhombise uholo olunohlonze.
UMnu Ramaphosa uqale ukule- kelela abafundi abahlwempu ngemifundaze yokufunda emanyuvesi ngowe-1991, lokhu kuholele ekubeni kusungulwe iCRET ngowezi-2000. Ukusungulwa kweShanduka Foundation ngowezi-2004, kusize ekunikeni iCRET inkundla yokukhula.
Lesi sikhwama siqale ukusiza abafundi abahlwempu ngabayisihlanu abebenza i- degree kwezamabhizinisi, sihlose ukusiza nabafundi abashaywa indiva ngezinye izinkampani nezinhlangano ezinikela ngemifundaze, lapho kubhekwa abenza kahle kuphela.
Sithi sizimisele ngokuqoka labo okucacayo ukuthi bangakhuliseka uma bengathola usizo olwenele lwezimali. Umfundaze wayo uhlanganisa izifundo, indawo yokuhlala, yizincwadi nemali yomphako.
Ngaphandle koxhaso lwemali, kunanohlelo lokukhulisana oseludume ngelomndeni weCRET. Kulolu hlelo bonke abafundi abangaphansi kweCRET baya eholidini lapho beyofunda khona ngomsebenzi kabili ngonyaka. Ngaphandle kweCRET, uMnu Ramaphosa unaneCyril Ramaphosa Founda- tion okuyinhlangano engenzi nzuzo nayo esiza kwezemfundo nasekuthuthukiseni kwezamabhizinisi.
Iqale iyiShanduka Foundation ngowezi-2004 - ngaphansi kweShanduka Group - isungulwe nguMnu Ramaphosa. Emuva kokuba uMnu Ramaphosa ebhoncule izikhonkwane kwiShanduka Group ngowezi-2014, ushintshe igama lalesi sikhwama kwaba yiCyril Ramaphosa Foundation - saqhubeka kodwa nemisebenzi yaso ebesisungulelwe yona.
Lesi sikhwama sisebenzisana nezinhlangano ezisebenza ukuguqula impilo yabantu okuyi-Adopta-School, iKagiso Shanduka Trust, iCRET neShanduka Black Umbrellas. I-Adopt-a-School neKagiso - besebenzisa iWhole School Development - ukuzama ukuba kunikezwe izingane imfundo esezingeni eliphezulu.
I-Adopt-a-School igqugquzela uhulumeni, izinkampani nabantu nje ukuba beseke ukwakhiwa nokugxiliswa kwezimo ezisengeni elihloniphekile zokufunda nokufundisa ezikoleni ezibhekene nezinselelo.
ICRET inikezela ngemifundaze ilekelele nangokunye kubafundi basemanyuvesi abantulayo, ibuye ilekelele ngokunika isipiliyoni kuleyo ntsha esikulungele ukusebenza.
IShanduka Black Umbrellas isebenza nosomabhizinisi abazimele, uhulumeni nezinhlangano zomphakathi ukwakha amabhizinisi azoholwa ngabantu abamnyama ngokugcwele - kuze kuyofika lapho kungekho okubavimbayo ukuba bangene ngisho noma yikumuphi umkhakha kwezezimakethe nezezimali.