I-ASA IQASHE INKAMPANI EZIMELE UKUTHOLA ABAXHASI
ISIQASHE inkampani ezimele ukuyifunela abaxhasi i-Athletics South Africa (ASA) esanda kuqeda ukukhokha isikweletu sika-R20 million ebesibhekene nale nhlangano eholwa ngu-Aleck Skhosana onguMengameli.
Lezi zindaba zitshelwe ILANGA nguSkhosana ngoMgqibelo ePort Shepstone. Kuzokhumbuleka ukuthi ibhodi kaSkhosana ingene kwiASA ngowezi-2014 kanti ngaleso sikhathi le nhlangano ibibhekene nezikweletu ezicishe zaholela ekudliweni kwehhovisi lale nhlangano eliseGoli.
“Kubukeka izinto sezihamba kahle kwi-ASA njengoba sesikwazile ukukhokha cishe zonke izikweletu zethu. Inselelo esesibhekene nayo ngeyokuthola abaxhasi abazosisiza ukuba sikwazi ukujabulisa abasubathi bethu njengoba benza kahle. Sisanda kuqasha i-agent ukuba isisize sithole abaxhasi.
“Ngeledlule sibuye nezindondo ezingama-24 kwiCAA Senior Southern Region eZimbabwe. NgoLwesine sineqembu eliya kwi- CAA Junior Champs e-Algeria, kulandele ele-International Association of Athletics Federation (IAAF) Youth Championships ezoqala mhla zili12 isongwe ziyi-16 kwezokwethwasa eKenya.
“Eminye imidlalo esiyibheke nonyaka yi-IAAF World Athletics Championships ezokuba ngoNcwaba (August) eLondon. Kule midlalo silindele abasubathi abafana noWayde van Niekerk, uCaster Semenya, uLuvo Manyonga, u-Akani Simbine, uSunette Viljoen ukubala nje abambalwa ukuba bap- hakamise ifulegi lezwe,” kusho uSkhosana.
Iqembu elizomela iNingizimu Afrika e-Algeria lididiyelwe kanje, kwabesilisa: uThembo Monareng, uMatsoso Tsebo, uClarence Munyai, uGift Leotlela, u-Ethan Noble, uThando Dlodlo, uZakithi Nene, uBraam Bisschop, uGeorge Kusche, uThabo Masina, uSiphiwe Mohlomi, uKabelo Seboko, uMpho Tladi, uLevert Pieterse, uThabo Maganyele, uShibodze Vutivi, uMarcello Pienaar, uLinford Maree, uLouwtjie Steenkamp, u-Eckhardt van der Watt, u-Aaron Pedro, uJunior Mpefu, uBurger Lambechts, uKyle Blignaut, uPatrick Duvenage, uWerner Visser, uFrancois Vermeulen, uCarel Haasbroek, uWerner Dames no-Anro van Eeden.
Kwabesifazane: uSimone van der Nest, u-Armoure le Roux, uSimonay Weitsz, uNiene Muller, uTyler Beling, uTshegofatso Setlhakgoe, uLesego Mpshe, u-Anet Koen, uTaylon Bieldt, uVelmein Hendricks, uTanya Ehrke, uYvonne Robson, uJana Steinmann noYolandi Stander.