Uyazisola ngezidakamizwa notshwala
Kunyomfeke okuningi emiswa iminyaka emibili
UZIMISELE ngokuvuka azithathe umgijimi waseNingizimu Afrika ozakhele udumo ngokuba ngowokuqala wakuleli ukwenza isikhathi esingaphansi kwemizuzwana eli-10 kwi-100m.
USimon Magakwe ubuya eminyakeni emibili engazihlanganisi nezemidlalo ngemuva kokutholakala ukuthi usebenzise izikhuthazi mzimba ezingagunyaziwe kwezemidlalo. UMagakwe usanda kuphumela obala ethi uyazisola ngesenzo sakhe sokusebenzisa izidakamizwa nokudla utshwala zonke izinsuku.
UMagakwe uthi uzimisele ukwenza kangcono isikhathi sakhe esingu-9.98 kwi-100m. Uthi angakuthokozela ukwenza lokhu ungakapheli lo nyaka. Ubuya kwezokugijima nje, izinto sezishintshe kakhulu njengoba irekhodi lakuleli kungu-9.89 kanti liphethwe nguAkani Simbine.
“Kuningi okubi engikwenzile. Ngizimisele ukushintsha impilo yami, ngenze kangcono nesikhathi sami kwi-100m. Ngizimisele ukuyogijima phesheya kwezilwandle ukuze ngibuyise udumo lwami. Ngichithe imali eningi kungenasidingo. Ngizimisele ukuphila impilo ehlanzekile manje,” kusho uMagakwe.
Omunye umgijimi osanda kwenza ezibukwayo ephuma ekumisweni ngenxa yezidakamizwa nguLuvo Manyonga ophethe irekhodi lakuleli kwiLong Jump kanti ubuye nendondo yesiliva nyakenye kuma-Olympic eBrazil.
* USimbine uhlomule ngabaxhasi bakwaLiquid Telecom SA abazinze eGoli.
USimbine ungomunye wabasubathi ababhekwe ukwenza kahle kwi-International Association of Athletics Federation (IAAF) World Athletics Championships ngoNcwaba (August) eLondon. ILiquid Telecom SA iqambe ihhovisi layo ngoSimbine kanti nendawo eyamukela izivakashi ibizwa nge-Akani Reception.
KwaZulu-Natal kuzoqhudelwana kwiViking 10km Challenge ngeSonto eHoy Park, eThekwini. Abafuna ulwazi ngalo mjaho bangaxhumana noBernard Nxumalo kwethi: 078 923 4303. I-KZNA ikuqinisekisile ukuthi ukhona lo mjaho.