ITHUBA LOKUYOFUNDA PHESHEYA KUBADLALI BEBHOLA
ASEPHOTHULIWE amalungiselelo eNtokozo Sikhakhane Soccer Camp ezoqala mhla zintathu isongwe ziyisi-8 kuNtulikazi (July) eRossburg High School, eThekwini.
USikhakhane ( osesithombeni) ujwayele ukuhlela le khempu njalo ngamaholidi okuvalwa kwezikole. Uthi lena yehluke kakhulu njengoba kwethulwe izinto ezintsha kuyona. Uthi unqume ukungayinqumi iminyaka yobudala kwabazokuba yingxenye yayo. Uthi le khempu imqoka kakhulu kubadlali njengoba amakilabhu ePremier Soccer League (PSL) ethungatha abadlali azogadla ngabo ngesizini ezayo.
Uphinde walanda uMarco Mthembu abebedlala naye kwiKaizer Chiefs ukuba yingxenye enkulu yale khempu. UMthembu useqeqesha izinhlaka zebhola eTexas College e-United States of America (USA). UMthembu unxuswe yisikhungo asebenza kusona ukunika abadlali imifundaze yokuqhuba izifundo esikhungweni sakhe.
“Abadlali abathile abenza kahle esikoleni nasebholeni bazokuba nenhlanhla yokuyofunda phesheya. Lokhu kumqoka ukuze sikhuthaze imfundo kubadlali bebhola. Okunye okumqoka ngale khempu wukuthi ikwazi ukuqoqa abadlali abayinqwaba isikhathi eside ukugwema ukuba wuvanzi njengoba kuvalwa izikole.
“Ziningi izinto ezimbi abangazithola sebengene kuzona ngenxa yesizungu. Ngihlele ukulanda abadlali abambalwa abagijima kwi-Absa Premiership ukuzokhuthaza abadlali. AbakwaLoveLife bazokuba bekhona bezoqwashisa abadlali ukuze baziphathe kahle,” kusho uSikhakhane ogijime kwiChiefs, kwiBloemfontein Celtic, kumaZulu nakwiBidvest Wits.
Uthi kule khempu kuzokuba khona u-Arthur Zwane oqeqesha isikimu seChiefs seMultiChoice Diski Challenge, uVusi Mthembu weMamelodi Sundowns, uJohn Maduka weCeltic, uBoysie Mngoma wamaZulu FC, yithimba labaqeqeshi beThongathi FC esanda kunyukela kwiNational First Division, uMandla Ncikazi oyisekela likaClinton Larsen ocija iLamontville Golden Arrows nabanye.
Uthi abadlali abasebancane bahlelelwe ama-coaching clinic, kanti asebekhulile bazoshukana ensimini kwinhlolokhono. Kuzoqokwa abathile abazodlala imidlalo yobungani namakilabhu amakhulu aKwaZulu-Natal.
Imali yokuba yingxenye yale khempu ngu-R200 ngosuku umuntu emunye.
Kuya ngomuntu ukuthi ufuna ukuhlala izinsuku ezingaki. Kule mali kubalwa ukudla, indawo yokulala nokuhambela imidlalo. USikhakhane uthi kukhona abadlali ababeyingxenye yekhempu yangePhasika asebethathwe ngamaZulu neRoyal Eagles.
Abafuna ukuba yingxenye yale khempu bangathinta yena ngqo uSikhakhane kwethi: 076 593 4477 noma uSiya Mncanyana kwethi: 078 958 3729.