Ugwema ukuncelisa amawele uSiyabonga Sangweni
UGWEMA ukuphatha amakilabhu amabili adlala esigabeni esisodwa seSAB League uSiyabonga “Nsimbi” Sangweni osethathe umhlalaphansi kunobhutshuzwayo.
USangweni odume kwiLamontville Golden Arrows, kwi-Orlando Pirates nakwiBafana Bafana, uphethe iDondotha All Stars neDundee Rangers okungamakilabhu adlala kwiSAB League ngaphansi kweSouth African Football Association (Safa) King Cetshwayo Region. IStars ibivele idlala kulesi sigaba kanti iRangers igencwe yizembe kwiSafa KwaZulu-Natal ABC Motsepe League.
USangweni uthe usezingxoxweni nabantu abathile bangakubo eDondotha ukuze bathathe ubunikazi bekilabhu eyodwa. UNsimbi lokhu ukutshele ILANGA ngoMsombuluko ngemuva kokwethulwa kweSiyabonga Sangweni Youth Festival and Mayoral Sports Day emahhovisi eKing Cetshwayo District, eRichards Bay.
Le midlalo isizokuba nkulu ngokwedlulele njengoba imali ebisetshenziswa kwiMayoral Cup ebididiyela amakilabhu ePremier Soccer League (PSL) isitshalwe kule midlalo kaSangweni. USmanga Mgenge oyiMeya yaseMfolozi, uthi iMayoral Cup imisiwe ngemuva kokuthi abanikazi beThanda Royal Zulu beyifake endalini. IThanda bekuba yiyona osokhaya kulo mqhudelwano njengoba izinze eRichards Bay. UMgenge uthi bazoqhubeka nokweseka abanikazi bekilabhu okulindeleke ukuba ibizwe ngeRichards Bay FC okubhekwe ukuthi idlale kwiNational First Division (NFD). Uthi sebezowavula kakhulu amehlo ukugwema ukweseka ikilabhu ngemali maqede ifakwe endalini. USangweni uqinisekise ukuthi womabili la makilabhu azozinza eDondotha.
“Ukudlondlobala kwemidlalo eqanjwe ngami kusho ukuthi baningi abadlali abazovela. Ngakhoke kumqoka ukuthi la makilabhu aphathwe eDondotha ukuze ezokwazi ukubabonela eduze abadlali. Okwamanje ngeke ngisho ukuthi ngixoxa nabaphi abantu ukuze bathathe ikilabhu eyodwa,” kusho uNsimbi okugcizelele ukuthi ngeke iholwe nguThami ongumfowabo ongukaputeni weChippa United osekhonjwa kwiBidvest Wits.
“UThami usanake ukudlala ibhola. Akekho kulezi zinto zokuphathwa kwamakilabhu. Ngizoyinikeza abantu abaseceleni,” kusho uSangweni omele iBafana Bafana kwiFifa Confederations Cup ebikuleli ngowezi-2009 nakwiNdebe yoMhlaba ngowezi-2010. Uphinde wadlala kwiCaf Champions League nakwiCaf Confederation Cup emele iBucs.