I-DOWNS IZOHLABA IKHEFU ELINGEKHO
IZOHLABA ikhefu lamasonto amathathu nje kuphela iMamelodi Sundowns esembhidlangweni wokuzama ukuvikela isicoco seCaf Champions League kulo nyaka.
ISundowns izobhekana neSaint George yase-Ethiopia emdlalweni womlenze wesibili esigabeni samaqoqo ozokuba ngoMgqibelo ngo15h00 e-Addis Ababa Stadium. Izobuya kulo mdlalo izolungiselela owe-AS Vita Club yaseDemocratic Republic of Congo (DRC) ozokuba ngoLwesihlanu lomhla ziyisi-7 kuNtulikazi (July) enkundleni yakuleli esazomenyezelwa.
UManqoba “TV” Mngqithi oyisekela likaPitso “Jingles” Mosimane ocija iDowns utshele ILANGA ukuthi emuva komdlalo we-AS Vita bahlela ukuthatha ikhefu lamasonto amathathu, bese beqala amalungiselelo eMTN 8 okuwumqhudelwano okuvulwa ngawo isizini yePremier Soccer League (PSL).
“Okusisiza kakhulu kulesi simo esibhekene naso sokungasitholi isikhathi esanele sokuphumula wukuba nethimba lodokotela bezinga eliphezulu abasiza abadlali ukuba sesimweni,” kusho uMngqithi.
Abadlali beDowns abathwele kanzima ngababuye badlale kwiBafana Bafana kubalwa uHlompho Kekana ongukaputeni wamaSandawana, uPercy Tau, uTebogo Langerman ukukha nje phezulu.
ISuperSport United ilibangisa eGuinea kule mpelasonto ukuyobhekana neHoroya emdlalweni weCaf Confederations Cup ozokuba ngoMgqibelo ngo-15h00 eStade 23 Septembre. Ngempelasonto elandelayo le kilabhu izoshukana neCF Mounana yaseGabon emdlalweni ozokuba seLucas Moripe Stadium, e-Atteridgeville.
IPlatinum Stars izolibangisa e-Algeria ukuyogadulisana neMC Alger koweCaf Confederations Cup ozokuba kusasa ngoLwesihlanu ngo-22h00 eStade du 5 Juillet. Ngempelasonto elandelayo iPlatinum izovakashelwa yiMbabane Swallows yaseSwaziland ukuzobhekana emdlalweni ozokuba seRoyal Bafokeng Sports Palace.