MASIQHUBEKE NEMPI YOKULWA NENDLALA
NJENGOBA sesisemaphethelweni enyanga yabantu abasha, mangiphinde ngikugcizelele ukuthi impi esibhekene nayo namuhla eyokulwa nobubha nendlala.
Ukusweleka kwamathuba omsebenzi kubantu abasha kuyinkinga kakhulu njengoba bengaphezulu kuka-54% abantu abasha abafundile kodwa abangasebenzi.
Siyadinga ukwenza njengabanye abantu abasha basemazweni asethuthukile lapho besebenzisa ubuchwepheshe ukuzakhela amathuba omsebenzi kanye nokwenza imali.
Esikhathini sanamuhla i- technology isabalele kakhulu ukuvumela wonke umuntu ukuba akwazi ukuyisebenzisa ngendlela ezomthuthukisa iphinde ifake nemali ephaketheni. Abantu abasha ucwaningo lwezomnotho lukhombisa ukuthi yibona abathanda izinto ezibizayo kakhulu ngisho besengabafundi bengakasebenzi.
Baphatha amafoni abizayo adlula nawabantu abasebenzayo, bagqoka izimpahla ezinamagama ezibiza ezidlula ngisho ezomuntu osebenzayo, angiyiphathi eyotshwala.
Lokhu kukhombisa ngokusobala ukuthi nabantu abasha kumele bakufunde kusemanje ukwazi ukusebenzisa ubuchwepheshe ukuze ukwazi ukutshala kanye nokukhulisa imali yakho ngokusebenzisa ubuchwepheshe besimanje.
Ama- platform ezinkampani ezifana noSatrix, Coronation, Allen Gray ayatholakala kwi-internet ukusisiza sikwazi ukutshala izimali zethu ukuze sizokhula sithole nenzuzo enamandla futhi enkulu.
Ubuchwepheshe be- internet sebenze kwabalula kakhulu ngisho ukutshala izimali phesheya kwezilwandle ngokuba uzenzele wena ngaphandle nje kwabadayisi bemikhiqizo yezimali. Namuhla sekukhona namaRobo Advisor okungamakhompyutha akweluleka ngokwezimali. Amandla e-internet awavulile amathuba empumelelo ezimali, masisukume sakhe umnotho njengabantu abasha ngokusebenzisa ubuchwepheshe esivele sinabo.
Gadget Of The Week
Kuleli sonto i-iPhone igubha iminyaka eyishumi yabakhona kanti maduze nje silindele isimanga seiPhone 8. Asengaphezulu kuka1Billion ama-iPhones asedayisiwe kusukela emkhiqizweni wokuqala ngo-2007 kanti namasheya akhona asakhula ngokuphindiwe njengoba esakhiqiza osozigidi. *USboniso Mtshali uyi-IT Entrepreneur | Forex Trader | Investor | Author | Financial Coach | Public Speaker. Ungaxhumana naye kanje: Mob: +2778 210 8384 Email: sboniso@afronicdata.co.za Facebook: Sboniso Mtshali