INTSHA ISINE YADEDELANA NGOSUKU LWAYO
BEKUKUHLE kudelile mhlaka 16 June 2017 ehholo kwa-A kwisigceme 18 esiholwa nguKhansela Musa Mdlalose, intsha yas’Ondini isina idedelana emgubhweni wosuku lwentsha ngaphansi kobuholi bukaMhlonishwa Khansela W.M Ntshangase. OkaMgazi ngalolu suku udele isikhundla sakhe sobuMeya waqoka iMeya ehlala esigungwini sokuphatha okunguKhansela Reggie Nyawo ukuba ibe yiMeya yosuku. Ethula inhloso yosuku uMhlonishwa uMeya ubalule ukuthi ufisa abantu abasha bas’Ondini bagxile kakhulu emfundweni nasemakhonweni ezobuchwepheshe okuyiwona adingekayo. Uphinde waphonsa inselelo kubafundi bebanga lesikhombisa ukuthi uma sebeya ebangeni lesishiyangalombili, kumele bakhethe iMaths neScience, waphinde wakuphawula ukuthi Ulundi lubekwa kunombolo yesibili ezibalweni eziphezulu uma kubhekwa isifo sesandulela ngculaza, kanti kumele abantu abasha basazi lesi sifo ukuthi sikhona futhi siyabulala. Uthe ufisa ukuthi eminyakeni ezayo kube wukuthi lesi sibalo sesehlile. Abaphathi bohlelo bekunguMbuso Ndlovu noSmilo Khanyile okungabaholi bentsha lapha Ondini. UNophiwa Zulu ongumfundi waseMasibumbane High School obekhethwe njengesikhulumi ngalolu suku nozethule njengo-Advocate Zulu, ukhulume ngokuziqhenya ngokuba wumuntu omusha wasoLundi nonekusasa eliqhakazile, waphinde wathinta nokubaluleka kwemfundo, wakhuthaza intsha ukuba ingagxili ezintwenu ezimbi ezenziwa yintsha yanamhlanje. Esinye isikhulumi bekunguNkanyiso Shongwe oyilunga leYouth Council yasoLundi, othinte kakhulu iphuzu lokuziqalela amabhizinisi, kungahlalwa kulindwe imisebenzi kuHulumeni. Ukhuthaze intsha ukuba izibambele ekusunguleni amabhizinisi amancane okuzithuthukisa nokwenza impilo iqhubeke noma kunzima. Uthe ngeke kulunge lutho uma intsha izohlala isonge izandla. Intsha ebivela kwiZululand FM nakwiNguni FM yethule izinkulumo zokugqugquzela intsha ekutheni izithuthukise ngamakhono ehlukene. IMeya yosuku ikhulume ngokubaluleka kwemfundo yathi: “Siyintsha yasoLundi kumele silwisane nokuhlukunyezwa kwezingane nabantu besifazane, futhi lapha oLundi lo mkhuba ngiyathemba ngeke ubekhona. Siyafisa ukuthi abantu abasha babe yingxenye yezobuchwepheshe, abantu abasha bangene kwiinternet ukuze bafake izicelo bathole nolwazi abaludingayo”. Obeyisikhulumi sosuku uNkz Nokubonga Mahaye ugcizelele kakhulu ekutheni abafundi kumele bagxile emfundweni yasemanyuvesi bazi ukuthi ikusasa labo lisezandleni zabo. Unxuse ukuba bangazibandakanyi ezidakamizweni. “Akekho umuntu oyisehluleki emhlabeni, oseke wahluleka empilweni kumele azi ukuthi likhona ithuba lesibili empilweni, akupheleli ephutheni elikuwisile. Uma umuntu ewile makavuke azithathe,” kukhuthaza iMeya yosuku uKhansela Nyawo. Umcimbi unandiswe ngabaculi bendawo abehlukene kwakuhle kwadela.