AMEHLO OMHLABA ABHEKE KU-WAYDE
EZOKUSUBATHA: Uzogijima okokuqala i-400m selokhu wanqoba kuma-Olympic
AMEHLO athe njo kuWayde van Niekerk ozogijima okokuqala i-400m selokhu eqophe irekhodi elisha lika-43:03 kuleli banga kuma-Olympic Game nyakenye eBrazil.
UWayde uhlabe ikhefu kuleli banga kusuka ephule irekhodi likaMichael Johnson wase-United States of America (USA) eliwu43:18 awubeka ngowe-1999. UWayde uhalaliselwe ngisho nanguJohnson. UWayde uzokube enza ibanga lakhe namuhla ngoLwesine ngo-21h40 kwi-International Association of Athletics Federation (IAAF) Diamond League eLausanne, eSwitzerland.
UWayde uzogijma umjaho wanamuhla ehambela phezulu kwazise ngeledlule uphinde waphula elinye irekhodi likaJohnson kwi300m Ostrava, eCzech Republic. Ucishe u-30:85 owenziwa nguJohnson ngowezi-2000 ePretoria wabeka u-30:81.
Kulo mjaho kakungabazeki ukuthi inkundla izokube igcwele iphuphuma abathandi bezokugijima befuna ukuzobona lesi silomo saseNingizimu Afrika senza esidume ngakho.
Abanye abasubathi bakuleli abazokube bebhekwe kakhulu kule mijaho yanamuhla nguLJ van Zyl, uCornel Fredericks noHenrico Bruintjies.
UMengameli we-Athletics South Africa (ASA), u-Aleck Skhosana, uthe balindele ukuba uWayde aqhubeke nokugila izimanga emi- jahweni yomhlaba. Uthi akangabazi ukuthi uzophinda aqophe omunye umlando namuhla kwazise unesivinini esanele njengoba ebegxile emabangeni amafushane ngokuqala konyaka.
USkhosana uqhube wathi unethemba lokuthi iNingizimu Afrika izokwenza kahle kakhulu kwi-IAAF World Championships ezokuba ngoNcwaba (August) eLondon. Uthi okumqinisa idolo wukuthi emidlalweni edlule ebiseBeijing, eChina, elakuleli libuye nezindondo ezintathu ezitholwe nguWayde ozuze igolide, u-Anaso Jobodwana noSunette Viljoen abahlomule ngezethusi ngokwahlukana.
“Ziyangithokozisa izinto ezenzeka kwezokugijima kulezi zinsuku. Abasubathi bakuleli sebephula amarekhodi abasubathi base-USA. UWayde ulikhuphula njalo izinga lakhe. Nyakenye wephule irekhodi likaJohnson le-400m eBrazil njengoba esekuphindile lokho. Ngaphandle kukaWayde, baningi abanye abasubathi abenza kahle enginethemba lokuthi bazophakamisa ifulegi lezwe eLondon.
“Emidlalweni yakamuva yeConfederation of Africa Athletes (CAA) ebise-Algeria ngempelasonto sibuye nezindondo ezili-17 kubasubathi abali-15 ebesihambe nabo. UClarence Munyai ophethe irekhodi lomhlaba kwi-300m ungomunye wabasubathi abancane abenza kahle,” kusho uSkhosana ophethe ngokuthi ngelizayo bazomemezela iqembu lezwe eliya eLondon. Umjaho kaWaydeuzoboniswa kwi-SS8.
ZIYANGITHOKOZISA EZENZEKA KWEZOKUGIJIMA...