UNYELWE YINYONI ESANDLENI UKHUZANI
SIHLABANE ngengqayizivele yethuba isilomo simasikandi, uKhuzani "Ndlamlenze" Mpungose, ngesikhathi sethulwa ngokusemthethweni njengenxusa lenkampani iShow Me Your Number emcimbini obuseCity Hall, eGoli izolo ngoLwesithathu.
Lo mculi uzoqhuba umkhanka- so wale nkampani obizwa ngoBuntu Initiative okuhloswe ngawo ukuxwayisa abesilisa ngokuhlukunyezwa kwabesifazane nokuthi abantu bazithande, bazinakekele.
UMnu Mabalane Mfundisi okhulumela iShow Me Your Number, uthe impela uKhuzani useyinxusa labo, sekulindeleke ukuba yonke indawo ahamba kuyona ashumayele ivangeli elithi amadoda mawazithande, avikele abesifazane.
Le nkampani inesivumelwano seminyaka eyisihlanu nalo mculi. UKhuzani wehlelwa yile nhlanhla nje, ubevele ezogubha ukushaya igolide ngengoma yakhe ethi “Isixaxa Samaxoki”.
Eminye yemisebenzi okumele ayenze njengoba eseyinxusa, wukuthi ezingomeni zakhe ibe khona ekhuluma ngoBuntu Campaign aphinde lapho ehamba khona - ikakhulukazi kubalandeli bakhe - alishumayele leli vangeli. Ezibongela uKhuzani, uthe:
"Ngijabule ukuba yinxusa leShow Me Your Number kwazise ifaka nabalandeli bami. Ngiyabonga kakhulu kwabangesekile".