Umashelwe ngumphakathi owuhlupho
Uwuhlalise lubhojozi
ASHAYE inhlabaluhide ngoLwesibili alibangisa eNkantolo yeMantshi yaseManguzi, enyakathompumalanga yeKwaZulu-Natal amalunga angaphezulu kwama-200 omphakathi waseSivananda, eManguzi, eyomashela ukuba angacatshangelwa nhlobo umsolwa obevele kule nkantolo.
Abeyophikisana nokunikezwa ibheyili kukaMnu Nhlakanipho Sithole osolwa ngokuhlalisa lubhojozi umphakathi wangakubo. Ukhalelwe ngamasongo kaSgonyela ngenyanga edlule njengoba esolwa ngokudlwengula abesifazane okuthiwa bangenelwe ezindlini, wukugqekezwa kwendlu yelunga lomphakathi, wukweqa ezitokisini esiteshini saseManguzi nokubamba iqhaza ebugebengwini bokwebiwa kwezimoto ziweliswe umngcele ohlukanisa iNingizimuAfrika neMozambique.
UMnu Nkululeko Mthethwa oyimeya yaKwaMhlabuyalingana, enyakathompumalanga yeKwaZuluNatal - obuye abe yikhansela lakuwadi 11 - uthe baye enkantolo ukuyonxusa iziphathimandla zayo ukuba zingalinge zimdedele umsolwa ngoba uwuhlupho emphakathini. “Sihlangene nomphakathi sabonisana ukuthi kungaba yikhambi elihle ukuba siphume ngobuningi bethu sizomasha ukuze inkantolo ibone ukuthi kasimdingi umsolwa endaweni. Makavalelwe adonse ejele ngoba kusukela eminyakeni eyedlule akakaze ashaywe nangamaphoyisa okanye aboshwe.
“Kwesinye isikhathi ukhishwa ngobhululu bakhe abambisene nabo ekuhlaliseni lubhojozi umphakathi. Nakubo sidlulisa umyalezo oqinile othi sizobabamba njalo kungekudala. Siphinde saphuma nesinqumo sokuthi sizohlala lapha enkantolo kuze kube wukuthi uyagwetshwa.
“Kulo lonke uhlobo lobugebengu olwenzeka lapha endaweni, kuthinteka igama likaNhlakanipho. Ngendlela adume ngayo ungathi ngumdlali webhola elikhokhelayo.
“Umkhankaso wethu wokulwa nobugebengu, usazoqhubekela nakwezinye izindawo ukuze sizokwazi ukubhekana ngqo nezigameko zabo,” kusho uMnu Mthethwa.
Imantshi uMnu Martin Groom, iqoke ukuluhlehlisa usuku lokufakwa kwesicelo sokuba ngaphandle ngebheyili kukaMnu Sithole. Ithe kusafanele kuphume ithimba layo ukuba liyobheka ukuthi umsolwa uphephe kangakanani uma kungenzeka imdedele.
“Ngesizathu sokuthi kasazi ukuthi uphephe kangakanani emalungeni omphakathi azonxusa ukuba singakudedeli, uzoqhubeka nokubala izinsimbi zesicabha zasesitokisini.
“Kakuvumelekile ukuba sikudedele ekubeni kunabantu abakusongelayo ngaphandle.
“Lokho kuyobe kuchaza ukuthi sikunikela ngokusemthethweni ezandleni zomphakathi ukuba ukudle luhlaza. Isicelo sakho sizobuye sibhekwe mhla ziyisi-8 kuNcwaba (August) kophezulu,” kusho uMnu Groom.
Kwesinye isikhathi ukhishwa ngobhululu bakhe abambisene nabo ekuhlaliseni lubhojozi umphakathi. Nakubo sidlulisa umyalezo oqinile othi sizobabamba njalo kungekudala...