Kutholwe owesifazane enqunywe uqhoqhoqho
Kusolwa abafanyana bendawo abebemkhaphile
UTHUKA izanya umphakathi waseNzala, eMsinga, maphakathi neKwaZuluNatal emuva kokuba kutholakale owesifazane enqunywe, uqhoqhoqho ungaphandle ngoLwesibili.
Kubikwa ukuthi lesi sigameko senziwe ngabafana abancane okungoneminyaka eyisi-8 nonengama-20 ubudala. Ngokuthola kwe
uNkz Sendelephi “Gqezu” Ngubane (38), ubulawe kade evela komunye umuzi wakwaMbatha khona eMsinga, obuqamama nakwakhe.
Kubikwa ukuthi uNkz Ngubane nomama wakulo muzi abeyekuwona, baphuza ndawonye nezinye izakhamuzi uma bezijabulele. Kuthiwa ngenxa yokuthi ubeseqhuba imbuzi - esedle kakhulu - kwacelwa izingane zabafana ukuba zimphelezele kanti zizomjikela endleleni zimnqume ngebhodlela zamshiya eshonile.
Umthombo weLANGA uthi izindaba zokuthi unqunywe ngebhodlela zivezwe ngumfanyana oneminyaka eyisi-8 ubudala othi uphoqiwe, wasatshiswa kuthiwa makabambe izandla zikaNkz Ngubane ngesikhathi enqunywa.
Uthi kukhona okushaya amanzi ngokubulawa kukaNkz Ngubane ngoba onina balezi zingane kabakhombisi ukuzwelana nomndeni ngalesi sigameko kanti kunezinsolo zokuthi banalo ulwazi ngokwenzekile kwazise ngesikhathi umphakathi ubabaza ihlazo bona bebengakhathazekile.
Kuthiwa lona oneminyaka engama-20 ubudaba, ugcine esekuveza phambi kwamaphoyisa ukuthi ubethengwe ngabathile ezoholelwa ngembuzi emuva kokuphothula umsebenzi nakuba engalivezanga igama lomuntu obemthumile. Ugcine ethathwe ngamaphoyisa eyophenywa esiteshini.
“Lo muntu (uNkz Ngubane) uhlala nezingane zakhe ezincane ngoba ngonyaka wezi-2013 ushonelwe nguyise wazo, usengumuntu obeziphilisa ngokupatanisa. Kalukho udlame noma ingxabano esiyaziyo ebikhona phakathi kwakhe nabanye endaweni ngoba ngisho uma esephuzile akayena umuntu odelelayo, ubezikhonzele ukuziculela.
“Kasiyazi le nto eyenziwe yilezi zingane, kasikaze siyibone eMsinga. Sinethemba lokuthi amaphoyisa azophenya liphume lonke iqiniso uma kunetulo elikhona mhlawumbe kungesikhona ukuthi izingane beziganga,” kusho umtho- mbo.
ILANGA lithole ukuthi ngosuku lwesigameko amaphoyisa athathe abazali babasolwa nabo imbala kwayokwenziwa uphenyo ngalesi sigameko. UMnu Sibongiseni Ngubane oyilunga lomndeni, uthi yena umenyezwe ngelinye ilunga lomphakathi lithi libona udadewabo (uNkz Ngubane) elele kabi ngasemhosheni oseduze nomuzi. Uthi akapholisanga maseko, uphuthume khona.
”Bekubonakala ukuthi bebemhudula emuva kokumbulala ngoba belibonakala igazi kanti-ke bekulula nokumnqoba kwazise ubedle amambawu. Sidumele kakhulu ngento eyenziwe yilezi zingane kodwa sinethemba lokuthi amaphoyisa azowenza umsebenzi wawo liphume lonke iqiniso uma kuwukuthi bakhona nabanye abathintekayo nabo baboshwe.
“Udadewethu ubengeyena umuntu ohluphayo ngoba nokuphuza kakuyona into yamanje, ubevele ekwenza ngisho kusekhona uyise wezingane zakhe.
“Ushiye izingane ezincane esingazi sizozenzenjani manje,” kusho uMnu Ngubane. Uthi kunezinsolo zokuthi nokudlwengulwa kwenzekile kudadewabo kodwa isidumbu sisazohlolwa.
Uveze nokuthi okwenzekile kuyethusa kakhulu ngoba kwenziwe yizingane ezizalwa ngabantu abaphuza naye udadewabo. Induna yendawo, uMnu Mandlenkosi Zuma, uthi sebenovalo ngenxa yesihluku esenziwe yizingane sokubulala umuntu omdala ekhala.
“Inkulu imfihlo ekhona kule nto eyenzekile. Kasisahleli kahle endaweni, phela kasikaze silibone ihlazo elingaka kule ndawo. Namanje umphakathi uphithene amakhanda, sekucacile ukuthi izwe libi uma izingane ezikhasayo sezikwazi ukwenza into efana nalena,” kusho uMnu Zuma.
Uthi kakubanga wumsebenzi onzima ukubanjwa komkhondo ngoba laba bafana yibona abagcine ukubonakala nomufi futhi kabaphikanga. Utshele ILANGA ukuthi isikhwama semali ebesiphethwe nguNkz Ngubane, sitholakale singasenamali. Okhulumela amaphoyisa KwaZuluNatal, uLt Colonel Thulani Zwane, uthe amaphoyisa aseMsinga ayaphenya ngaleli cala.
"Kutholakale owesifazane enqunywe uqhoqhoqho. Isizathu sokubulawa kwakhe kasikaziwa. Umsolwa oneminyaka engama-20 ubudala uboshelwe icala lokubulala uzovela eNkantolo yeMantshi eMsinga namhlanje ngoLwesine,” kusho uLt Colonel Zwane.