Babuyele emsebenzini othisha abebexoshiwe
Basola uthishanhloko ngokuhlohla abazali
LISUKILE ijoka emhlane kothisha abathathu ebese bejike nelanga izinyanga ezintathu bexoshwe wumphakathi ngoba kube nokungaboni ngasolinye phakathi kwabo nothishanhloko waseSilindele Primary School, KwaNyuswa, entshonalanga yeTheku - lapho bebefundisa khona.
UNkk Zanele Makhanya, uNkk Khanyi Makhanya noNkz Thandeka Mkhwanazi sebetholelwe izikole ezintsha njengoba kusaqhubeka uphenyo oluthinta ukuxoshwa kwabo, okusolwa ukuthi uthishanhloko, uMnu Muntukayise Gumede ubenesandla kukhona.
UNkk Cele usefundisa eMpilweni Primary School, uNkk Makhanya ufakwe eMontala High School, uNkz Mkhwanazi wayiswa eMolweni Primary okuyizikole eziseduzane nalapho bedabuka khona.
Batshele ILANGA ukuthi bathokozile ngokutholelwa izikole ngoba bekubaphatha kabi ukudla imali kahulumeni bengasebenzi futhi nabahloli bengazihluphi ngokulungisa udaba lwabo.
UNkk Makhanya uthi yize kusaphenywa kodwa kabasazimisele ngokubuyela eSilindele Primary ngoba sebeyamesaba uMnu Gumede. “Lo muntu wangishaya esikoleni phambi kwabafundi, kangisoze ngikhohlwe ngakwenze kimina. Ngijabule kakhulu ngesikwenzelwe wumnyango nakuba sitsheliwe ukuthi sisacushisiwe kulezi zikole kuzothi uma sekuphele uphenyo bese sitholelwa ezinye eziqondene nathi,” kusho uNkk Makhanya. ILANGA libike kwaze kwaba kabili ngokuxoshwa kwalaba othisha.
Kuvele ukuthi mhla zingama-30 kuMasingana (January), kugasele abazali eSilindele beyobaxosha ngoba kuthiwa bayalova futhi bashaya izidudla ngezimoto esikoleni. ILANGA lithole ukuthi bekukhona nabazali abangenazo izingane ezifunda kulesi sikole, abanye kabaziwa endaweni.
Kusolwe uMnu Gumede ukuthi nguyena ohlohle abazali wabatshela ukuthi akanelisekile ngalaba othisha. Kuvele ukuthi kunezimpi ezindala ezikhona phakathi kukaMnu Gumede nalaba othisha. Ngokuthola kweLANGA, uMnu Gumede ushaye uNkk Makhanya ngowezi-2015 phambi kwabafundi ekilasini likaNkk Cele kade kubangwa ukuthi uyisuseleni i- time table endala odongeni. Lesi sigameko kuthiwa sishiye izingane ziphazamisekile, zesaba - zibona uthisha eshaywa.
Emuva kwalokho icala lingenile enkantolo lamlahla uMnu Gumede wahlawuliswa u-R3 000. NeSouth African Council of Educators (Sace) imthole enecala nakhona wahlawuliswa. Kuvela ukuthi emuva kwalokho uMnu Gumede uthenge imvubu abehamba eviliyela ngayo emagcekeni esikole ethi kuboshwe imali hhayi yena.
UNkk Makhanya uthi kakusilona iqiniso ukuthi bayalova futhi kabafundisi. Utshele ILANGA ukuthi bekusetshenziswa abazali ukuze baxoshwe.
"Ngisebenze kulesi sikole engathokozile uthishanhloko ngoba ubefuna ukunikeza abangani bakhe isikhundla engikusona sokuba yinhloko yezifundo kanti mina ngifike sengiphethe incwadi yomnyango. Kuqale lapho ukuba angibheke wagcina ngakho-ke ukungishaya ethi ngiyixebuleleni i- time table ekubeni bengimtshelile ukuthi ibisiphucukile sizokwenza entsha. Ngidumalile uma sekufika abazali sesixoshwa kulo nyaka,” kusho uNkk Makhanya.
UNkk Cele yena kuthiwa ufele ukuba ngufakazi enkantolo ecaleni lokuthi uMnu Gumede ushaye uNkk Makhanya. Yena kuthiwe uthole incwadi nyakenye ethi uyasuswa eSilindile ngenxa yokwehla kwesibalo sabafundi khona. Uthi kumthuse kakhulu lokho ngoba kukhona othisha abaningi abafike emuva kwakhe, okuyibona obekumele kubhekwe kubona kuqala ozoyiswa kwesinye isikole.
Phambilini uNkk Cele uthe: "Ngilubikile udaba esekethe kwathiwa kufike incwadi ebhalwe yi- mina nefomu lapho bengisho khona ukuthi ngiyavolontiya ukushiya kulesi sikole, okuyinto ebingesilona iqiniso. Uma ibhekwa leyo ncwadi, kubonakele ukuthi igcwaliswe nguyena uthishanhloko,” kusho uNkk Cele.
Utshele leli phephandaba uku- thi kuthe uma sekuvulwa izikole kulo nyaka, wazithola engekho ohlwini olwenziwa nguthishanhloko lokunikezwa kothisha amakilasi nezifundo abazozifundisa, kwase kutheleka abazali baxoshwa.
UNkz Mkhwanazi yena kuvela ukuthi into axoshelwe yona wukuthi ngesikhathi abazali befika, ubekanye noNkk Makhanya noNkk Cele.
Ethintwa phambilini uMnu Gumede utshele ILANGA ukuthi yena ungumqashwa ngeke akwazi ukuphawula ngesikhathi enikezwa ithuba lokubeka uhlangothi lwakhe, wathi makuxhunyanwe noMnu Muzi Mahlambi okhulumela umnyango.
Kuthintwe noMnu Vusi Nene oyilunga lesigungu esilawula isikole, uthe yena uthole incwadi ebhalwe ngabanye othisha bakulesi sikole bethi kakusebenzeki nalaba abaxoshiwe.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi okubalulekile kakhulu wukuthi othisha bayasebenza okwamanje ngesikhathi kusaqhubeka uphenyo, kabasavuki beyoqhinqa esekethe. Uthi lokhu kuyizinkomba zokuthi umnyango uyasebenza futhi uyalandelela uma usubikelwe ngenkinga. “Sibe nezingxoxo nabahloli ngalolu daba, ezithathe isikhathi eside, safika esiphethweni sokuba othisha kumele batholelwe ezinye izikole kuze kube siqeda udaba lwabo. Kakusiyona into elula ukululandelela ngoba luthinta abantu abaningi kodwa uma sekuphothulwe konke, bazobe sebethola abazosebenza kuzona ngokusemthethweni,” kusho uMnu Mthethwa.