KUKHALWA NGEMALI YOTHISHA BASEMAKHAYA
BAKHIHLA esikaNandi othisha abangayitholile imali yesibonelelo sikahulumeni sokuthi bafundisa ezindaweni zasemakhaya ngaphansi kwezingqinamba KwaZulu-Natal. Sikhulu isililo ngokunyamalala kwale mali okunezinsolo zokuthi yehla ngemilenze kwezinye izikhulu eziphathiswe lolu hlelo. Inqwaba yothisha ngaphansi kwabanye omasipala bezifunda, isizwakalise ukukhalaza ngokungayitholi le mali, okuthiwa sekuphele unyaka wesibili ingabonwa. Othisha abakhala kakhulu ngabangaphansi kukaMasipala wesifunda uMzinyathi, ezikoleni ezakhele iNquthu naseMsinga.
Omunye wothisha - ocele ukuba ligodlwe igama lakhe - ofundisa eMsinga, uthi imali yangonyaka ophelile bekumele bayithole kulo nyaka kodwa kucwebe isiziba. Utshele ILANGA ukuthi uhlelo lokukhokhelwa kothisha basemakhaya beluphathiswe amahhovisi ezemfundo ngaphansi komasipala bezifunda lwabuye lwasuswa khona ngenxa yokungethembeki kwezisebenzi, lwasingathwa yiwona ngqo umnyango wezemfundo.
"Bese sikhokhelwa yiwona umnyango kodwa nawo usunezinkinga. Ngeke siyimele le nto ngoba sekucacile ukuthi imali yethu ithathwa ngabanye abantu,” kusho lo thisha. Kukhona omunye ofundisa eNquthu okhulume naleli phephandaba naye okhala esifanayo. Isekela-mengameli leNational Teachers Union (Natu), uMnu Allen Thompson, lithi kuvela lezi zindaba nje, besebebhalele umnyango bacela ukuhlangana nawo ngoba bafuna ukuchazeleka ngesabelo-zimali esibandakanya yona imali yothisha basemakhaya. “Sithi umnyango mawukhiphe imali ngoba le nto oyenzayo ibulala imfundo yasemakhaya yabantu abamnyama kwazise izingane ziyabaleka ziye emadolobheni.
Izikole ziyavalwa ngenxa yokuncipha kwesibalo sabantwana, othisha bayabaleka emakhaya. Bekuwumqondo omuhle ukunika othisha aba- fundisa emakhaya le mali ngoba bagcina bengasasiboni isidingo sokuthutha. Sifuna le mali inikezwe ngisho othisha bakwaGrade R, onobhala nabo bonke abantu abasebenza ezindaweni zasemakhaya,” kusho uMnu Thompson.
Uveze nokuthi kuyabahlukumeza ukwanda kwesibalo sabafundi emakilasini ekubeni othisha beshoda ngoba lokho kwenza othisha bangakwazi nokubona umfundi onenkinga esifundweni esithile.
Uthi ukuvulwa kwezikhala zokuqashwa kothisha kugcine ngowezi-2009 kanti njengamanje zingaphezulu kwezi-2000 izikhala zabahloli okumele baqashwe, okwenza izikole zingasebenzi kahle ngoba kazigadiwe. uNobhala weSouth African Teachers Union (Sadtu) KwaZulu-Natal, uNkz Nomarashiya Caluza, akatholakanga ocingweni lwakhe. uNobhala weSouth African Teachers Union (Sadtu) KwaZulu-Natal, uNkz Nomarashiya Caluza, uthi lolu daba bayalwazi futhi balwa nalo njengoba sebethole izikhalazo eziningi zothisha abathi kabayazi imali ukuthi icwilephi. Uthi kubonakala ingasafezeki inhloso yalolu hlelo ngokwesethembiso somnyango sokubonelela abafundisa emakhaya.
“Sesiqalile ukuhambela omasipala bezifunda, siyazithola kakhulu izinkinga. Kunamafomu agcwele laphaya angasayiniwe, kasazi ukuthi kungani. Kukhona abayitholayo imali kodwa abanye kabayitholi,” kusho uNkz Caluza.
Uthi bebephakamise emnyangweni ukuba lolu hlelo lusingathwe yisikhungo esisodwa ukuze lulawuleke ngoba lunezinkinga ezingaqondakali. Okhulumela uMnyango wezeMfundo KwaZulu-Natal, uMnu Kwazi Mthethwa, uthi luzobhekwa lolu daba nokuthi kungani kukhona othisha abangayitholi le mali. Uveze nokuthi umnyango usenezinkinga ngokuqashwa kothisha abasha ngenxa yokuntenga komnotho.