KUFUFUSA ISITELEKA SAMATEKISI
BANGASE bazithole besenkingeni yokufinyelela emsebenzini abagibeli baseNingizimu Afrika njengoba kuhlongozwa ukhukhulengoqo wesiteleka samatekisi ngesonto elizayo.
NgoLwesithathu kulindeleke ukuba kujame yonke into uma kuwukuthi lesi siteleka sibakhona njengoba kulindeleke umhlangano phakathi kobuholi beSouth African National Taxi Council (Santaco) noNgqongqoshe wezokuThutha eNingizimu Afrika, uMnu Joe Maswanganyi, okusasa ngoLwesihlanu.
UMnu Thabisho Molelekwa weSantaco, uthi ubuholi bale nhlangano buhlanganile izolo ngoLwesithathu ekuseni banquma ukusimisa lesi siteleka kuze kube buhlangana nongqongqoshe njengoba ebabizele emhlanganweni kusasa.
Ubike ukuthi konke kuzocaca ezingxoxweni abazoba nazo kulo mhlangano ukuthi siyaqhubeka yini isiteleka. UMnu Molelekwa uthi phakathi kwezinkinga abafuna zilungiswe, wudaba oludala lwezimvume zokusebenza. Uthi izimvume abanikezwa zona wumnyango zinesikhathi esithile okumele uma sesiphelile zivuselelwe. Utshele ILANGA ukuthi lokho kubanikeza inkinga emabhange.
"Yinkinga endala lena ungqongqoshe kusenguMnu Sbusiso Ndebele. Uphumile naye kwangena uNkk Depuo Peters nakhona lapho kazilungiswanga lezo nki- nga njengoba sekukhona omusha nje. Ngakho sithi uma kuwukuthi ungqo
ngqoshe ngoLwesihlanu akasiniki ithemba lesixazululo esiphuthumayo, isiteleka sizoqala ngoLwesithathu,” kusho yena.
Uthi inkinga ngezimvume ikhombisa ngokusobala ukuthi uhulumeni kawuzimisele ngokuthuthukisa ibhizinisi lomuntu omnyama ngoba usebenzisa indlela emcindezelayo ngaso sonke isikhathi.
“Siyakuqonda ukuthi uNgqongqoshe Moswanganyi ngeke axazulule izinkinga zakudala ngosuku olulodwa kodwa uma esinikeza izethembiso ezizodinga silinde unyaka wonke, isiteleka sizoqhubeka ngoba sesiside isikhathi sikhala singanakiwe.
“Sicela kubagibeli bethu ukuba basibekezelele ngoba lokhu esizama ukukulungisa kuzosiza bona ukuba bangagcini sebekhokha imali eningi uma begibela amatekisi ethu. Sizozama ngakho konke okusemandleni ethu ukuba ngoLwesihlanu sifinyelele esivumelwaneni nongqongqoshe, ukugwema isiteleka ngoLwesithathu‚" kuphetha yena.
Kwenzeka lokhu nje, kuzokhumbuleka ukuthi ngenyanga ephelile kusuke isidididi ngesikhathi abamatekisi KwaZulu-Natal naseGoli bemisa izimoto zabo bekhala ngenkampani ekhiqiza izimoto zohlobo lweQuantam, iToyota. Bebekhala ngemali abayikhokhayo ngenyanga nemishwalense ebaqothula amaphakethe.