BANINGI ABASHAYA AMAKHALA NGOKUTAKULWA KWE-SAA

UNGQONGQOSHE wezimali uMnu Malusi Gigaba ( osesithombeni), ugixabeze iSouth African Airways (SAA) ngesizumbulu semali ukutakula umkhumbi ozikayo kule nkampani ngaphezu kokuba kade ememezele ukuthi useyisusile ezintweni azozixaka ngazo.

UMnu Gigaba ngaleli sonto, umemezele ukuthi bazosiza le nkampani ngo-R2.3 billion ukuze ikhokhe isikweletu sayo sika-R9 billion eStandard Chartered Bank okumele ngabe ibisisiqedile ukusikhokha ngoNhlangulana (June) kodwa kwangenzeka.

Lokhu kutakulwa kamuva kweSAA kwenzeka nje, ilahlekelwe yimali engango-R30 billion. Le mali abahlaziyi bomnotho bathi ingacishe yakhe izindlu zomxhaso ezilinganiselwa ezi-300 000 zabantu abahluphekayo. I-South African National Civic Organisation (Sanco) ithi imali okugixabezwe ngayo iSAA, iwukufaka imali emgodini ongagcwali. I-Democratic Alliance (DA) ngomlomo kaMnu David Maynier, ithi kuyethusa ukuthi umnyango wezezimali ulokhu uthatha imali yabantu abahluphekile uyifaka kwaSAA ekubeni le nkampani ikhombisa ukuthi iyinqanawe ezikayo, kalisekho ithemba lokuthi ingaphinde ikwazi ukuzimela yenze inzuzo.