Kunezimpi okufanele ungazilwi ukuze unqobe

INKINGA kakuyona inkinga kodwa yindlela oyibuka ngayo noyithatha ngayo okuyiyona eyinkinga. Bonke abantu abaphila phansi komthunzi welanga bekufanele balazi leli qiniso lokuthi kayikho inkinga engadluli, yonke into empilweni iyadlula.

Inkinga ingeyesikhashana nje. Ungabothi uma wehlelwe yisehlo bese usifaka efrijini, ungayivumeli ingqondo yakho ibe yifriji lezinkinga.

Kunezinto ezimpilweni zethu okufanele ngabe kade sazikhohlwa noma zadlula futhi nje kufanele ngabe lezo zinkinga kade zabola kodwa ngenxa yokuthi uzifake efrijini, zihlale njalo zizintsha.

Umuntu udalwe kabi ukuba njalo nje uhlale ekhumbula into ebuhlungu emphatha kabi kunale emphatha kahle. Usuke udalwe kahle empilweni uma ukwazi ukudlulisa.

Uthi bewazi ukuthi uma umuntu engake angayi endlini encane, azikhulule noma nje engake angakwazi ukuzikhulula, angafa ngoba kunezinto ezingena ngomlomo okufanele uzidlulise zingahlali kuwena?

Mhlawumbe futhi zikhona nezinto ezingena ngamehlo nezindlebe okufane uzidlulise. Ungayiphili impilo yokubamba zonke izinto ezenzeke empilweni yakho ezingasile.

Into umuntu imehlela kanye sekukuyena ukuthi uyayigcina yini into emehlele. Uma ungakwazi ukuhleka, impilo iyokuhleka yona kusasa. Ngivame ukuthi yonke into eyenzekile bekufanele yenzeke ngoba isiyenzekile.

Ukukhula empilweni kwenza ukwazi ukwamukela ezinye izinto futhi ezinye bese uzidlulisa ungazigcini enhliziyweni yakho. Ukuphila kusivezela ngokusobala ukuthi uma umuntu ephefumula kunomoya awudonsayo bese kuba khona awukhiphayo.

Bekufanele singabantu sifunde ukuthi kunezimo okufanele sizikhiphe emiqondweni yethu futhi nje ngingasho ngingananazi ukuthi kunabantu okufanele empilweni yakho ubafake futhi kunokufanele ubakhiphe.

Uma kukhona abantu abakugilile empilweni, kufanele wazi ukuthi ngeke bashaywe nguwena. Umuntu okugilayo empilweni akashaywa nguwena kodwa uzoshaywa lapho eya khona. Umuntu le nto ayenze kuwena uzoyenza nakwabanye ngoba ithi ingacaba ithambo ijwayele.

Ngeshwa uyothi uyayenza kwabanye kanti usebhedela abantu abangabhedelwa futhi bayoze bamtshele ukuthi thina kasifani nobani.

Abantu abakugilayo empilweni nabasangana ngegama lakho, bafana nezimpethu. Izimpethu zidla isidumbu, uma zisiqeda zibe sezi- dlana zodwa bese ziyafa.

Kunabantu empilweni abasangana ngegama lakho, bakudicilele phansi, kufanele wazi ukuthi abantu abasangana ngegama lakho ngeke ufe ungababonanga belwa bodwa ngoba ngeke izimpethu zingadlani zodwa.

Yingako-ke isisho sesiZulu sithi izimpethu zidle isidumbu zasiqeda zase zidlana zodwa zafa. Impi kakusiyona eyakho kodwa ingekaJehova.

Kunezimpi okufanele ungazilwi ukuze unqobe futhi kunabantu okuyofanele uvume ukuba bakuhlule ukuze wena ubahlule. Ungayilwi impi engenasicoco, ungayifaki inkinga efrijini. Yonke inkinga efikile empilweni yakho izodlula.

* Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10. SiseJewish Hall enkabeni yeTheku.

Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke.

Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyaku-beka nasemkhulekweni. *UPastor Sthembiso Zondo ungumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034

Ungabothi uma wehlelwe yisehlo bese usifaka efrijini, ungayivumeli ingqondo...