IMPILO YEVANGELI KUYAFUNEKA SIYIPHILE NASEMAKHAYA
NGOKUKAMATHEWU 11:1
ESIKUFUNDA kule ncwadi yanamuhla wukuthi uJesu eseqede ukuyala abafundi bakhe, wemuka lapho wayofundisa washumayela emizini yabo.
Lokhu kusifundisa lukhulu maqondana nokuthi ivangeli lethu kakufanele ligcine ngaphandle kwasemakhaya lapho siphila khona, kufanele uma kuyiwa emakhaya ethu kungaficwa impilo ephambene nesiyiphila uma sisezinkonzweni noma ekushumayeleni kwangaphandle.
Ngamanye amazwi, ivangeli lilungisa umuntu limlungisele abantu bangaphandle liphinde limlungisele impilo yasekhaya ukuze angabi ngudumakude noma aphile izimpilo ezimbili: eyasebandleni neyasekhaya okutholakala ukuthi kayimvezi lo Jesu amshumayelayo. Namuhla maselulekane nabantu abasetshenziswa nguNkulunkulu ngezindlela ezehlukeneyo ukuze ivangeli labo liphile nasemakhaya abo. Ziningi izinto okumele zifundiswe abazalwane ngempilo elindeleke ukuba bayiphile emakhaya ngoba kuningi okusitha ivangeli labo lapho bephila khona.
Ake siqale ngabo uqobo labo abathunywe ukushumayela ivangeli.
Kunabantu abanothando olukhulu abathanda ngalo abazalwane ababasebenzayo nasemabandleni abangobaba kuwona kodwa okuthi uma sekufanele bathande imindeni yabo - okufaka uthando lwamakhosikazi abo nabantwana babo - uthole ukuthi ekhaya kabalwazi nhlobo lolu thando.
Lokhu kuyaba nomphumela ongemuhle emindenini yabantu abashumayelayo, okuyikhona okwandisa ukonakala kwemishado eminingi ngoba kusuke sekukhona izinto ezingasenziwa emakhaya kodwa ezenziwa kakhulu ezinkonzweni kugcine lapho. Miningi imishado elinyazwe ngamadoda kaNkulunkulu aphila ezintabeni ngokushumayela agcine esekhohliwe wukubuyela emakhaya ukuyofeza inkonzo elindeleke kuwona.
Lokho kugcina komama abasele emakhaya sekunezindlela abazizamela bona ukuba baziphilise ngazo ngesikhathi ubaba esekushumayeleni.
Kuthi mhlazana ebuya emuva kwesikhathi eside engazi ukuthi baphila kanjani ekhaya, kuvele kube wumonakalo wodwa ogcina sewenzekile ngesimanga nje somuntu ongafundisekile ngempilo yasekhaya kodwa owazi kakhulu ngobizo lwakhe kuphela.
Empeleni iyafundiswa le nto yokuthi umuntu akathi engubaba webandla enkonzweni kodwa futhi angakukhohlwa ukuba ngubaba nendoda yasekhaya layo ukuze ivangeli lethu lingahlanjalazwa.
Kunevesi elitholakala kuThithu 2:3-4 eliqondene ngqo nokufundiseka kwabantu besifazane ukuthanda amadoda abo nabantwana babo.
UNGATHANDI KAKHULU INDODA YASEBANDLENI UKWEDLULA EYAKHO Isizathu salokhu wukuthi kuyenzeka kube nabantu besifazane abathanda kakhulu amadoda asenkonzweni ukwedlula amadoda abo emakhaya.
Kokunye kuyenzeka ukuba abanye omama bathande kakhulu izingane zasenkonzweni baze bakhohlwe ngezabo emakhaya.
Abantu besifazane kufanele baqaphele ukuthi uthando lwamadoda abo lungantshontshwa ngolwabefundisi emabandleni ngoba lokho kungalimaza isithunzi sevangeli uqobo kuze kube namadoda alenyanyayo.
Phela indaba isuke yonakale ekufundisekeni ngempilo yasemakhaya.
Uma ungumama kufanele uqaphele ukuthi indoda yakho uyenza ibe semqoka kakhulu kunomfundisi wakho, ukuze igcine isidonsekela kuyona le nto ophila ngayo.
Kunabantu besifazane okuthi uma kufika umfundisi ekhaya bakhiphe izitsha zekhethelo ezingasebenzi kubaba wasekhaya, okuthi uma efulathela ziphindiswe emakhabetheni zilinde ukuthi kuphinde kuvakashe yena. Ngasohlangothini lwabesifazane abagcotshwe nguNkulunkulu emsebenzini weNkosi, kufanele nabo bafundiseke ukuze bakwazi ukwahlukanisa phakathi kokuba yisisebenzi sikaNkulunkulu nokuba yinkosikazi yasekhaya.
Bakhona abesifazane abagcotshwe nguNkulunkulu ngale ndlela yokuthi uma sebebuyela emakhaya emadodeni abo, bangabe besathoba nhlobo benze amadoda abo izichuse zasemakhaya.
Konke lokho kudinga ukuba bafundiseke ngakho abesifazane abashadileyo.
Kunezinceku zikaNkulunkulu ezisebenza umsebenzi weNkosi ezisengcupheni yokulimalela emsebenzini eziwenzayo ngenxa yamakhozikazi azo akholwayo kodwa abudedengu maqondana nokunakekela nokusondela eduze kakhulu emadodeni ayizinceku zeNkosi.
Lokho kuvula ithuba lokuba kusondele kakhulu abanye abantu besifazane nosizo obekufanele lutholakale enkosikazini.
Konke lokhu kungagcina sekuyilimaza leyo nceku ngasohlangothini lobungcwele.
Phela uSathane uvele asebenzise usizo obekufanele lutholakale enkosikazini yenceku engumzalwane.
Amakhosikazi ezinceku mawaqaphele ukunakekela amadoda awo ukuze ivangeli lingahlanjalazwa.
--------------------------------
Lalela uDkt M.S. Mncwabe kwiNANDA 88.4 FM ngeSonto ngo6-9 ebusuku ohlelweni “UBIZO LWAKHO”. Uyatholakala kwethi: 072 320 1773. Calling Promotions Ministries 176 Dr Pixely kaSeme (West Street) Durban
Umuntu akathi engubaba enkonzweni angakhohlwa
wukuba ngubaba noma indoda uma esefikile ekhaya.