Inxusa likaPhapha kuvulwa indlu
KWENZEKE okungavamile enkonzweni yokuvulwa ngokomthetho kwendlu yebandla lamaRoma aKhatholika, KwaMalusi Omuhle, eMahlabathini, enyakatho yeKwaZulu-Natal ngoMgqibelo.
Kule nkonzo bekuhlangene ubuholi besizwe samaZulu obebumelwe yiSilo uZwelithini kaBhekuzulu sihambisana nondunankulu wesizwe, iNkosi Mangosuthu Buthelezi.
Bekukhona obamaKhatholika bumelwe ngu-Archbishop Peter Bryan Wells olinxusa likaphapha eNingizimu Afrika, ngubbhishobhi wedayosi laseShowe, uRt Rev Xolelo Thaddeus Kumalo.
Ezinye izihambeli eziqavile ebezikhona kubalwa imeya yasoNdini, uKhansela Wilson Ntshangase, osomabhizinisi, uMnu Senzele Johnson Mhlungu nowakwakhe, uNkk Elizabeth Mhlungu abanikelele leli bandla ngalesi sakhiwo ebesivulwa.
Indlu yakhiwe yaphelela ngakho konke kubalwa nendlu yemishini futhi yabiyelwa kahle ngothango lwesimanje.
Usuvuliwe umnyango wendlu emuva kokungqongqotha nje- ngophawu lokuvulwa kwayo, uMbhishobhi Wells entshumayelweni yakhe yokubusisa isakhiwo, ufanise lolu suku nalolo iNkosi Jesu eyahambela ngalo eJerikho lapho yahlangana khona noZakewu.
Uthe njengoba iNkosi uJesu yaletha insindiso endlini kaZakewu, ubona le ndlu izonika insindiso kubantu bendawo lapho yakhiwe khona.
Ube esecaphuna namazwi adumile kaphapha lapho ethi “Abapristi kumele babe njengabelusi abahlala lapho lizwakala khona iphunga lezimvu ngokuba bazilibale ukuthi bangobani kepha basondelane nalabo abanganakiwe."
Emazwini okwethula iSilo uZwelithini, iNkosi Buthelezi ithe babusisekile ngokuhlanganyela naso (iSilo) nenxusa likaphapha kuleli, kulo mcimbi.
Ubongele isizwe samaZulu ngeqhaza lebandla lamaKhatholika kwezemfundo nezempilo njengoba neSilo sazalelwa esibhedlela salo, iBenedictine, KwaNongoma, enyakatho yeKwaZulu-Natal.
Sethula inkulumo iSilo, sithe amakhosi aKwaZulu amemukela uNkulunkulu ngesikhathi kufika abefundisi bezimishini bezoshumayela esizweni samaZulu.
Sizwakalise ukujabha ngokuthi kule mihla abantu kabasawahloniphi amasonto njengoba sekugqekezwa ngisho izakhiwo zawo kwebiwe impahla.
Sifanise indlu nomkhumbi kaNowa ngoba kuzokwamukelwa kuyona bonke abaya kuyona njengoba kwakuhlalisene ndawonye zonke izinhlobo zezilwane emkhunjini.