KUNGATHENJELWA NAKUBALIMI ABAFU
NGESIKHATHI uhlelela intwasahlobo, zinike inselelo wena ngokwakho ukuze ukhuthale ekubambeni iqhaza ekugaleleni kwezomnotho wendawo ohlala kuyona.
Kuyashiwo emkhakheni wezomnotho ukuthi osomabhizinisi abancane bayawusimamisa umnotho wezwe, kanjalo nabalimi abancane bangayiqeda indlala ezweni. Umsebenzi obalulekile ofezwa ngezolimo wukondla isizwe ngokudla kwekhethelo okuyinala namanzi ahlanzekile omthombongashi.
Yileli galelo okumele kukalwe ngalo ukuthi ezolimo ziyakwazi ukufeza lesi sidingo hhayi nje kuphela ngokubala ubungako bendawo okuzotshalwa kuyona noma inani labantu abazosebenza emasimini.
Bonke abalimi abangebakhulu, kumele bazame ukuvikela ukumosheka kwezithelo nemifino ngenxa yamabanga amade kuhanjiswa ezimakethe ngoba phela inhloso wukungakulahli ukudla ngenxa yokonakala kwakho.
Uzobona ukuthi ezweni lonke bukhona lobu budedengu bokumosheka kokudla; esilungwini kumosheka ematafuleni lapho abantu bedla ezindaweni zokudla okuphekiwe, bese bethi chokochoko nje, bashiye kuchithwe. Ngokunjalo nasezindaweni zasemakhaya, kumosheka kungakaphekwa ngoba kungekho iziqandisi ezizolula isikhathi sokudla okungaphekiwe noma mhlambe umlimi uhambisa isivuno emakethe amabanga amade - sithi sifika, sibe singena emgqonyeni.
Ngesikhathi umlimi ehlelela ukutshala, kumele asebenzise ithuba elivezwa wukwehlukana kwemvelo okutholakala endalweni lapho etshala khona. Kungaba yizinhlobonhlobo zezinambuzane, izilwanyana nesimo sezulu sale ndawo akuyona nezinhlobo zokhula
ezimbi nezinhle ezimile phakathi kwezitshalo.
Ukuqapha lesi simo sendalo kusiza umlimi ukulungiselela isivuno sekhethelo. Kumqoka ukutshala ngokuxuba izitshalo ngale ndlela ekhuthaza ukudideka kwezinambuzane eziwuhlupho kodwa ibe ikhuthaza impilo yeziwusizo ezitshalweni nasemvelweni esensimini.
Ngale ndlela kubhekeleleka ukondleka kwenhlabathi, izitshalo, imvelo, imfuyo nabantu ngoba kuyakhuthazwa ngisho nokuxuba nezihlahla zezithelo nezomthunzi emfuyweni, ebantwini nasemhlabathini. Uma umlimi ekwenze konke lokhu, akanaso isizathu sokungazuzi emalini uma esevuna futhi kuyodlula kusale ngisho nalokho okuzokondla umndeni wakhe.
Uma umndeni womlimi wondlekile, kulula ukuxhaseka nokubhekelela ukondleka kwesizwe, okuyinto ebalulekile ekwakheni umnotho nenhlalakahle yezakhamizi ezweni. Imfuyo nezilwane zasendle njengabantu, kudinga inkululeko etholakala endalweni ukuze kukwazi ukuqhuba yonke inkambiso yokuba wumdlezane ngesikhathi kukhuliswa amachwane namazinyane.
Yingakho nje umlimi kufanele aqikelele ukuthi akafuyi ngendlela yokucinanisa imfuyo, akathumbi izilwane zasendle azicinanise endaweni encane. Izilwane zasendle angazisebenzisa uma kunesidingo ekusimamiseni isivuno. Zama ukuxoxa nomakhelwane nikwazi ukushintshanisa isikhathi sesivuno ngendlela ekhuthaza ukutholakala kwaso unyaka wonke ngesikhathi kuthunyelwa esinye ezimakethe.
Imininingwane echaza kabanzi ingatholakala ngokusithinta kwethi: 082 789 4281 noma ubhale ekhelini elithi www. sicelokunene.co.za , ekhasini elithi: "Contact us."