NGEKE ULUNGE ESITHENJINI UMA UYIPIGOGO
NGIYANIZWA nje bodadewethu nithi uma uMnu Musa Mseleku wodumo lohlelo “Uthando Nesithembu” engabeka amabili amathathu , ningagxuma nihlale niyoba wunombolo 5. Njengeqhikiza lenu bozakwethu abangozendazamshiya, amaqhasha emijendevu nomabuyemendweni, ngicela ukubuza ukuthi niqale nini ukuthanda isithembu.
Ngaphezu kwalokho, ngicela ukwazi ukuthi njengoba ningoNtoyami kangaka, nizokumela yini ukuthanda ingane yomunye umfazi ngokungazenzisi. Phela esithenjini kayikho into yakho nje wedwa, konke ngokwenu, ngokwala nigane khona. Uma kuthiwa umyeni uyagcagca namuhla, wena nkosikazi omunye ovele esekhona, ungena esixukwini nje, uyaphithizela, uyasebenza uphansi phezulu wenza isiqiniseko sokuba umshado walapha ekhaya uhamba kahle, nomakoti lo ozayo ufika cha impela wemukelwa kahle.
Isikhwele eceleni le kude. Kayikho le nto yo “my husband” laphaya, kumele usho kugcwale uthi “our husband” futhi usho umamatheke, ungalokhu ubipha la, ha-haaahaaa. Kanjalo nezingane zabanakwenu ngezakho-ke ngikutshele. Ngiyayithanda-ke le yezingane ngoba uthola umuntu engena esithenjini azi kahle ukuthi indoda isiganwe ngamakhosikazi amabili, yena uzoba ngowesithathu, futhi injalo nje le ndoda isinazo izingane ezingaphambi kweyakhe.
Uyafika laphaya ungqesta usebiza ingane ngoyise kaSinothando wakhe ekubeni kunoNtombikayise ozalwa yinkosikazi endala noSiyanda ozalwa yinkosikazi yesibili, cha! Uzoba yipigogo uqhwage uyise kaNtombikayise umbiza ngeyakho nje ngamabomu, uchuku la luhamba khona. Ngale kokuntela nokuncokola, ake niyeke ukugwegwisa izinto. Thina sikhule ubaba ebizwa ngokuthi nguyise ka… bese kushiwo igama likabhuti wethu omdala kumam’ odala. Ehhene, bekusesithenjini nakithi.
Omama abeza kamuva bebengenasikhathi sokulwela ukuthi sekuzobangwa ukuthi nabo bambize ngezabo izingane, hhayi bo. Olwani uchuku! Ngiyacabanga nje lokho kunika isithunzi inkosikazi endala nokuvuma nje ukuthobela le nto abathi yi- protocol. Ukuvume nje ukuthi kawuyona indlunkulu yakulowo muzi. Musa ukubangisa umamkhulu esikhundleni sakhe ngoba noma sekunomcimbi, nguyena onegunya lokukhipha inyama yamakhosikazi endawo ngezithebe, kudliwe.
Wena okwakho uyakwazi, vele wazela khona ukuzolekelela umamkhulu kukho konke, ncika kuyena-ke musa ukufuna ukuzomqinela, habe! Uthole umuntu enenhliziyo embi nje sdalo bese ethi ufuna isithembu, we bhatata! Usahlulwa wukunaka izingane zesoka lezi elizizale ungakafiki. Ngiqale ngayiziba le ndaba emasontweni ambalwa edlule kuqala uhlelo lwakwaMseleku kumabonakude kanti kuzoba nesasasa kule mpelasonto uMseleku etheleka namakhosikazi akhe bebahle beconsa laphaya emcimbini wamahhashi nemfashini, iVodacom Durban July.
Kuthiwa bekungezintombi bekukhiza nje zizilahla kuMseleku, zimdonsa ngapha nangapha ezinye zicela ukushutha izithombe naye. Nokho abezithombe kabanasimanga ngoba ukushutha izithombe kakunankinga ne-ncuuuu, kwazisholo izalukazi. Inkinga yilaba asebevele bafana nesimo sezulu, gwiqiqi sebesithanda ukufa isithembu ngoba nakhu bebona esakwaMseleku kwi-tv. Ngisho bona laba abebethi cha ngeke balubhade esithenjini ngoba kwasha kwacima, kwavutha amalangabi.
Njengoba sebeguquke bazalwa kabusha ngenxa kaMseleku, ake bazibuze ukuthi bangakumela yini ukuthobela umthetho wasemganweni oyisithembu noma babona sengathi isithembu wumdlalo kamas’gcozi wobukhazikhazi, kuyodliwa imali yomyeni nje kutetemukwe ngezimoto. Laphaya uthasisela yonke into kundlunkulu, inkosikazi endala namanye amakhosikazi ogane nawo. Njengoba sewujwayele ukugqanqula nje nokuziphatha, ngeke ulunge mntakagogo.
Mhlawumbe yile mizi eyizithabathaba uMseleku ayakhele amakhosikazi akhe edida abantu bese bebona sengathi hhowu, wubala isithembu inqobo nje uma indoda isutha. Abantu futhi mabayeke ukubukela phansi laba abazikhethela ukungena esithenjini, belokhu bebanameka amagama alumelayo. Kusemganweni laphaya, ziyaphenduka, izinselelo zobufazi zithe bhe futhi uzobe ugane nomunye umuntu noma abangaphezu koyedwa.
Ubani nobani uza neconsi lakhe, akekho onesikhathi sakho. Uyedwa okhuluma abhadluluke sengathi udilika emthini, omunye uyancishana futhi ukhonze ukunihleba kubaba wekhaya. Sekuyoba kuyena-ke ubaba ukuthi ungumuntu okwaziyo yini ukuhlaziya into ngaphambi kokuqula amacala.
UThobile Nxumalo nguMhleli oMkhulu weLANGA. Ungaxhumana naye ku: Thobile.Nxumalo@ilanganews.co.za noma editor@ilanganews.co.za. Ukhona nakuFacebook: Thobile Nxumalo, kwiTwitter: @ThobileNxumalo nakwi-Instagram: nxumalo_r_nxumalo