UKHWELE WADILIKA KWI-KZNA
UGXEKA iKwaZulu-Natal Athletics (KZNA) ngokuba nezisebenzi ezigqugquzela imijaho yazo bese zicindezela ehlelwa ngabantu abanuka iqaqa kuzona uBernard Nxumalo odidiyela iViking 10km Challenge ebhuntshe ngemizuzu yokugcina njengoba bekumele igijinywe ngeledlule eHoy Park, eThekwini.
UNxumalo ukhomba ngenjumbane iKZNA eholwa nguSello Mokoena ngokumenzela phansi. Uthi le nhlangano isimuphendule ikhondomu esisebenzile emuva kokuba esize abaholi bayo ukubuyela emandleni okhethweni obelunyakenye.
UNxumalo uthi uzenze zonke izimfanelo zokuhlela umjaho. Uthi uphoxeke kakhulu ngoLwesihlanu ethola ucingo oluphuma kuJohnson Nadassen wakwaMasipala weTheku emtshela ukuthi uma eqhubeka nalo mjaho uzomhlawulisa u-R300 000.
“UMasipala uthe bekufanele ngiwazise kusasele izinyanga eziyisi-6 ngaphambi kokuba ngihlele umjaho. Ngifonele uMokoena ngalo uLwesihlanu wangitshela ukuthi akamazi uNadassen. UNadassen ungitshele ukuthi iKZNA idlala ngami. Uthembise ukunginika olunye usuku lokwenza lo mjaho,” kusho uNxumalo.
UNxumalo uthi okumcika kakhulu wukuthi iningi lezisebenzi zeKZNA zinamakilabhu ahlela imijaho bese zingabi nandaba nehlelwa ngabaqhamuka ngaphandle kwaleli hhovisi ikakhulukazi uma bengenawo amagama. Njengamanje iKZNA isiphasise iFNB 10km engekho kwikhalenda.
“Kuningi engikwaziyo ngeKZNA, lapho ngizokhuluma khona bazosala bekhamisile. Kunesinye isisebenzi seKZNA esingitshele emasontweni amathathu edlule ukuthi bazowukhansela umjaho wami njengoba ugcine ungabanga khona,” kusho uNxumalo.
Kuthintwa uGoodman Cele oyiMenenja yeKZNA, uthe inkinga kaNxumalo wukuthi uhambela kude neKZNA. Uthi bazame izikhawu eziningi ukumsiza kodwa akaze afika ehhovisi. Uthi banomgomo owodwa wokusiza amakilabhu kwiKZNA. Uthi lokhu okushiwo nguNxumalo ngamampunge.
“Izisebenzi zeKZNA ezinamakilabhu ziyaziwa, zakuveza lokho. Uma zinemijaho ziyacela, zihlabe ikhefu. UNxumalo kufanele avume ukuthi unephutha. I-FNB 10km ingene esikhaleni seKZNA 10km Challenge. Ukuthi umjaho wakhe usazokuba khona noma ngeke leso yisinqumo esizothathwa yiRoad Commission ezohlala ngesonto elizayo,” kusho uCele.