URhoo no-16V emidlalweni kaNsimbi
BAZOHLOMULA ngolwazi olunothile ngonobhutshuzwayo abadlali bamakilabhu azokuba yingxenye yeSiyabonga Sangweni Youth Festival and Mayoral Sports Day eqala kusasa ngoLwesihlanu isongwe ngeSonto eDondotha Sports Ground, KwesaKwaMthethwa, eMpangeni.
Leli phephandaba lithole ukuthi uLucas “Rhoo” Radebe, uDoctor “16V” Khumalo noJerry “Legs of Thunder” Skhosana abazakhele udumo kunobhutshuzwayo wakuleli, bazocobelela abadlali ngokuningi okuthinta lo mdlalo.
Le midlalo izohanjelwa nguThamsanqa “Gandaganda” Gabuza, u-Ayanda Gcaba be-Orlando Pirates noSiyanda “Magazi” Xulu ochithwa yiKaizer Chiefs, uThami “General” Sangweni ongumfowabo kaSiyabonga okuqanjwe ngaye lo mqhudelwano.
UThami usanda kusayina inkontileka yeminyaka emithathu neBucs njengoba kade engukaputeni weChippa United. Kuthiwa kukhona nabanye abadlali abangaka- qinisekisi.
Kuzokuba nama-coaching clinic azosingathwa ngabadlali baKwaZulu-Natal asebathatha umhlalaphansi kunobhutshuzwayo.
USmanga Mgenge oyiMeya yaseMfolozi, uthi bazobhema bakholwe abazohambela lo mqhudelwano njengoba uhambisana nomcimbi wobumnandi.
Kulo mcimbi kuzonandisa abaculi okubalwa kubona uHeavy K, uNasty C, iDurban Finest ekhandwe nguDj Tira noSox, uBabes Wodumo, uKhuzani, uThokozani Langa, uMerlon noMondli, uHlengiwe Mhlaba, uThobekile, uQhoshangokwenzakwakhe, iNyoni Emhlophe, uHappy Girl ozophinde ahlomise intsha ngomkhakha wezobumnandi nabanye abaningi.
UNongcebo McKenzie woKhozi FM uzokuba ngomunye wabaphathi bohlelo.
Kuzokuba nemidlalo eminingi eyahlukene njengoba lo mqhudelwano usuhlanganiswe neMayoral Games ebihlelwa yiKing Cetshwayo District eholwa nguNonhle Mkhulisi oyiMeya yalo mkhandlu.