KUYAMTHOKOZISA OGANIWE UKUZWANA KUKANINA NOMKAKHE
MHLELI: Odabeni olubhalile lwezingxabano phakathi komakoti noninazala, ngiyazibuza nje ukuthi ngempela indaba yomakoti noninazala kumele kwenziweni ngayo.
Eyokuphilisana njengendodakazi nonina phela iyinkinga yawo wonke amakhaya. Inkinga isenhliziyweni yethu.
Uma umamezala ebuka umakoti abone isithikamezo noma abone umuntu ongafanele ukuba semagcekeni akwakhe, lokho kukodwa nje kuyinkinga okungelula ukuyelapha.
Kanjalo nomakoti obuka uninazala ngalelo so uzidalela inkinga engenasidingo. Ave kumnandi kithina besilisa ukubona nokuzwa omama nomakoti bethu bephilelana.
Kumnandi ukuzwa umama ebiza umakoti wakwakhe ngendodakazi, lokho kukodwa nje kuqinisa ubudlelwano phakathi kwabo kwenze nempilo ibe mnandi.
Ake ngithi nje Mhleli, ukwazana lokhu abamhlophe abathi yi- understanding thina-ke sithi wukuqonda ukuthi ngingubani, yikhona okusishayayo nokusehlulayo thina bantu abamnyama.
Uma omamezala nomakoti bengaba nalokhu kwazana, kungaba mnandi impela. Njengoba usushilo Mhleli ukuthi mabazane amaconsi abo ukuze nxa selimsukile omunye - lona omunye angethuki - azi ukuthi sekumsukile-ke lokho - bese eba nendlela yokumelapha, amehlise lelo consi lakhe.
Ave kubuhlungu ukuba indodana izace ngenxa yokungezwani kukanina nomakoti ekhaya.
Uma niphathene kamnandi niyobona sengathi singabesilisa sisho ngemikhaba ngoba inhliziyo ikhululekile.
Nokuhlala sivakasha njalo kuyophela ngoba kuyobe sekumnandi lapha ekhaya. Ngingajabula ukubona omamezala benesizungu somakoti babo kanjalo nomakoti koninazala babo.
Libusisiwe ikhaya likamamezala oziqhenyayo ngomakoti bakwakhe. Petrus “umzukulu kaGogo” Radebe, eMadadeni ENEWCASTLE