Kuzohlomula abezindawo zasemakhaya
Kuzoncishiswa imidanti ukuze kusabalale umnotho
IGQUGQUZELE ukuba kwenziwe izinto ngendlela engajwayelekile ukuze kuhlomule osomabhizinisi basemakhaya kwezokuvakasha, iMeya yaseZululand, iNkosi Mzamo Buthelezi.
Lokhu ikwenze ngesikhathi yethula inkulumo esidlweni sasekuseni ebesiyingxenye yomkhankaso obizwa ngeZululand Tourism Roadshow. Ikhuluma kulo mcimbi obuhanjelwe yizikhulu ezahlukene kwezokuvakasha, ezikahulumeni nosomabhizinisi.
Imeya inxuse ukuba kuncishiswe imidanti ethatha kude ukuze umnotho usabalale kubona bonke abantu. “Ezokuvasha zisaqhubeka nokwenza kahle nakuba isimo somnotho sintengantenga, kodwa kuyakhathaza ukuthi kunabantu bakwezinye izindawo abahlomulayo kulo mkhakha ngomlando waKwaZulu.
"Akekho okumele akhulume ngomlando waKwaZulu ukudlula thina eZululand. Inhliziyo yamaZulu iseZululand njengoba okuthinta umlando kwenzeke ngaphansi kukamasipala wethu, “kusho imeya. Ezokuvakasha kulo masipala zigxile emlandweni wamakhosi aKwaZulu. Kuthiwa iningi labantu abavakasha kule ndawo baqhamuka eGoli naphesheya kwezilwandle kanti inhloso yabo wukuyohlomula ngolwazi oluthinta amaZulu.
UMnu Nathi Mayise owengamele ezokuvakasha kulo masipala, uthi basezinhlelweni zokufundisa abantu ngalo mkhakha nokuthi bangahlomula kanjani kuwona. “Sihlela ukuhambela bonke omasipala abangaphansi kweZululand nezikole ezinezokuvakasha,” kusho uMnu Mayise. Phakathi kwezindawo ezivakashelwa kakhulu kule ndawo, uMnu Mayise uthi yiseMakhosini lapho kunamadlinza amakhosi ayisi-7 nalapho kwalwela izimpi eziqavile. Ngaphandle komlando waKwaZulu, uthi kuningi abantu abangazithokozisa ngakho njengokuqwala izintaba nokubona izilwane zasendle.