KUQINISWA IMITHETHO KWABANOGCOBHO
SIZOQINA isitilobho komasipala abathole umbiko onogcobho KwaZulu-Natal njengoba uNgqongqoshe wezokuBusa ngokuBambisana nezoMdabu, uNkk Nomusa Dube-Ncube, ethi bazothathelwa izinyathelo ezinqala.
Emhlanganweni abe nawo nezikhulu zomasipala abangenzanga kahle eBongweni Youth Centre, eKokstad ngoLwesihlanu, uNkk Dube-Ncube uthe ngaphandle kokuthi (lezi zikhulu) ngeke ziwathole amabhonasi njengoba zingenzi kahle ekuphathweni kwezimali, zizophinde zibizelwe ekomitini eliqondisa izigwegwe ziyochaza ukuthi kungani amabhuku omasipala engcolile.
Uthe umnyango ngeke uqhubeke unikeze iChief Financial Officer (CFO) nemenenja umholo ogcwele kodwa ibe yehlulwa wukwenza umsebenzi ewuqashelwe wokubhalansisa amabhuku.
“Kuyagcina kulo nyaka ukuthi nithole umbiko onogcobho bese kucweba iziziba nje. Kukhona omasipala abehlulwa wukusebenzisa imali ebihlelelwe ukuhlinzeka umphakathi ngezidingo igcine isiphindiswe emuva.
"Umasipala ozophindisela imali emuva, uzochaza ukuthi bekwenzenjani. Kasikwazi ukuba nesimo lapho abantu bezobhikishela khona ingqalasizinda, bekhonondela izidingo kodwa uthole kunemali eduve kumasipala ingasetshenziswa,” kusho uNkk Dube-Ncube. Uthi izimeya kakufanele zihlale zithule, zilindele ukuthi izimenenja zizosebenza ekubeni zibekwe ukuba zibe yiso kumasipala.
“Nakuba kunomasipala abangama-48 abanombiko ongenagcobho, kodwa kakusijabulisi ukubakhona kwabathola ugcobho. Umbiko womcwaningi-mabhuku ukhombisa ukuthi bali-14 omasipala abangatholanga imibiko ehlanzekile.
Izifundazwe ezinomasipala abaningi abathole imibiko ehlanzekile yiWestern Cape, iKwaZulu-Natal neEastern Cape (16%). IWestern Cape iyikhuphulile imibiko yayo ehlanzekile isuka ema-73% enyakeni odlule kuya ema-80%.
I-Eastern Cape, iLimpopo neMpumalanga yizifundazwe ezikhombise ukunyusa amasokisi kanti iNorth West, iNorthern Cape neFree State yizona ezishaye udaka kunazo zonke ngokwemiphumela.
Izinhlelo ezintekenteke zokulawula kwangaphakathi, zibe nesandla ekungaphathekini kahle kwezimali komasipala. Ukusetshenziswa budlabha kwezimali kunyuke ngama-50% kuya kuR16.81bn, nokuyisibalo esiphezulu kusukela uMcwaningi-mabhuku eqale ukugcina amarekhodi.